Qırımtatar halqınıñ yetekçisi Mustafa Cemilev aqqında «Mustafa» serlevalı film üzerinde çalışqan çıqaruv taqımı, Qırımda Rusiye akimiyeti tarafından repressiyalardan saqınıp, rejissörnıñ adını aytmay.
Bu aqta Qırım.Aqiqat Radiosınıñ saba efirinde Mustafa Cemilev aqqında vesiqalı filmniñ prodüsseri Tamila Taşeva bildirdi.
«Rejissörnıñ adını, elbette ki, aytmaymız, çünki o qırımlı, qırımtatarıdır, ailesi Qırımda olğanından seber öz adını aytıp olamay. Oña qarşı repressiyalarnıñ başlanması mümkün», – dey o.
Taşevanıñ aytqanı kibi, vesiqalı film çıqaruvında zemaneviy vesiqalı kino usulları qullanılacaq.
«Bir şeyniñ yañıdan yaratuvı sanaları ile, intervyü, öşek ile ve ilâhre. Bizden evel çıqarılğan kino, nasıldır bir tehnikiy vastalardan sebep, nasıldır bir resim boyunca bile biraz artta qalğanını añlaymız», – dey Taşeva.
Cuma künü, noyabr 13-de, Mustafa Cemilev 72 yaşını toldura.
«Mustafa» – Mustafa Cemilev aqqında ilk vesiqalı film. Maqsadı – cemaatçılıqqa qırımtatarlarnıñ küreşini, ar-namus, menligini aks etken ukrain siyasetçisiniñ canlı tarihı aqqında tarif etmek. «Mustafa» leyhası üzerinde prodüser, «KrımSOS» cemaat teşebbüsçisiniñ tesisçisi ve koordinatorı Tamila Taşeva, ukrain bestekârı, pianinocı, sound-prodüser Fima Çupakin, ukrain jurnalisti, publitsist, tarihçı Vahtang Kipiani çalışalar. Filmni 2016 senesi aprel ayında kösterecek olalar.
