Qırımnıñ rusiyeli Devlet şurası reisiniñ muavini Remzi İlyasov aytqanı kibi, Ukraina yolbaşçılığı «silâlı ziddiyetni Qırımğa keçirmek» niyetindedir.
Bu aqta Qırım parlamenti saytında aşkâr etilgen muracaatında aytıla.
«Cenübiy-şarqtaki adiseler Kiyev diktaturasınıñ silâlı ziddiyetni Vatanımız – Qırımğa keçirmege istegi olğanını tasdiqlay», – dey İlyasov ve «qırımtatarlarnı aldatmağa devam etkenleri», qırımtatarlarnıñ yetekçileri ise «vatandaşlıq cenkni başlamağa istegenleri» aqqında bildire.
İlyasov muracaatında Qırım qamaçavını ve qıtaiy Ukrainada bulunğan Meclis yolbaşçılığını takbih ete.
«Ukrainada yaşağan qırımtatarlarğa muracaat etem. Toqtañız! Toprağıñıznı raat qaldırıñ! Qırımtatarlarnı er vaqıt ikmet, namuskârlıq, itibar ve sabır içün ürmet ete ediler. Qomşu olıp yaşadıq ve qıyın allardan birlikte çıqa edik, bir-birimizni ürmet etip. Eminim, bu çizgilerni coymadıñız. Toprağımız o qadar accığa artıq çıdap olamay. Vatandaşlarnıñ qanını aqtırmağa azır olğan er bir insannı qarğalaycaq», – denile İlyasovnıñ beyanatında.
Meclis ve Ukraina yolbaşçılığından işbu muracaatqa cevaр daa yoq.
Sentâbr 20 künü Qırımğa aşayt malları ile qatnağan yük maşinalarınıñ qamaçavı boyunca Qırımtatar Milliy Meclisiniñ aktsiyası başlandı. Aktsiya idare şurasınıñ malümatına köre, memuriy sıñırdan yolcular ve yengil naqliyat maniasız keçecektirler.
Noyabr 2-de saba Qırımda ATR telekanalınıñ sabıq hadimleri Lilâ Bucurova, Elzara İslâmova ve telekanal saibi Lenur İslâmovnıñ ana-babası yaşağan evleri, em de Moskvadaki evinde tintüvler yapılmağa başladı.
Rusiyeniñ Merkeziy bankı İslâmovğa ait OOO «Cast Bank» müessisesiniñ litsenziyasını lâğu etti. Qırımtatar iş adamınıñ Qırım.Aqiqatqa bildirgenine köre, bu tedbirlerni Qırım qamaçavı ile bağlay. O, onıñ teşkilâtçılarından biri ola.
Remzi İlyasovnı 2014 senesi Meclis azalığından marum qaldırdılar.
Ukraina Yuqarı Radası 2014 senesi fevral 20 kününi Qırımnıñ muvaqqat işğaliniñ başlanuv tarihı olaraq belgiledi. Ğarp memleketleri Qırım işğalini tanımay ve bir sıra iqtisadiy cezalarnı kirsete. Rusiye yarımadanıñ işğalini red ete ve bunı «tarihiy adaletniñ qaytarılması» olaraq adlaу.
