Ukraina Silâlı quvetleriniñ baş ştabında şimdi Rusiye Federatsiyası nezareti altında olğan yarımada territoriyasından Qırım qamaçavı iştirakçilerine qarşı tariklerniñ ola bilecegini tüşüneler.
Bunı Qırım.Aqiqatqa Ukraina Baş ştabınıñ temsilcisi Vladislav Seleznev bildirdi.
Aytqanı kibi, Qırım yarımadasından Rusiye silâlı quvetleriniñ doğurdan ücümi olmasa bile, istihbarat-diversion gruppalarınıñ kelmesi mümkün.
«Bıltır mart ayından Rusiye Federatsiyasınıñ silâlı quvetleri Qırım şimalinde küçlü teşkilâtlandıruvnı meydanğa ketirdi. Doğrudan ücüm etmege tırışalar demege – keçerli degil, çünki memuriy sıñırnıñ eki tarafından da mina ile tarlalar bar. Olamaz. Amma tariklerniñ ola bilmesi, istiharat-diversion gruppalarnıñ kele bilmesi mümkün. Qamaçav iştirakçilerini itibardan tüşürmek içün tariklerni ete bileler», – dey Seleznev.
«Azov» vatandaşlıq korpusınıñ Qırım bölüginiñ komandanı Stanislav Krasnov Qırım.Aqiqat mühbirine degeni kibi, «Qırım «vatandaşlıq qamaçavı» iştarkçilerine ola bilecek ücümlerge «Azov» polkunıñ askerleri qarşılıq köstere bile».
«Yanımızda «Azov» polkunıñ temsilcileri buluna. Silâ, naqliyatı olğan balalardır. Qamaçavda iştirak etmegen, amma qomşu köyde bulunğanlar. Nasıldır bir tarik, silâlı ziddiyetler içün», – dey o.
Sentâbr 20 künü Qırımğa aşayt malları ile qatnağan yük maşinalarınıñ qamaçavı boyunca Qırımtatar Milliy Meclisiniñ aktsiyası başlandı. Aktsiya idare şurasınıñ malümatına köre, memuriy sıñırdan yolcular ve yengil naqliyat maniasız keçecektirler.
Qamaçav teşebbüsçileri degeni kibi, ukrain şirketleri Qırım ile ticariy munasebetni toqtatmaq kerek, çünki yarımada territoriyası Rusiye Federatsiyası tarafından işğal etilgen. Teşkilâtçılarnıñ malümatına köre, olarnıñ talapları yerine ketirilmegence, qamaçavnı toqtatmaycaqlar, yani siyasiy mabüslerniñ azat etilmesi, mustaqil matbuat vastalarına basqı kösterilmemesi, yarımadağa halqara nezaretçilerniñ kelmesi, qırımtatarlarğa qarşı areketlerniñ toqtatılması ve ilâhre.
