Qırımtatar Milliy Meclisi faaliyetiniñ Qırımda yasaq olunuvı qırımtatarlarnıñ daa da ziyade birleşüvine yol berir ve işbu temsiliy organnıñ itibarını daa da köterir. Bu kibi fikirni haber siyaseti naziriniñ Qırım meselelerinden keñeşçisi Emine Ceppar bildirdi.
«İşbu yasaq, aqiqaten, amelge keçirilse, qırımtatarlar aman birleşir, temsiliy organnıñ itibarı köterinir ve dünya miqyasında bir sebep olur, dünya toplulığı Qırımnıñ işğаlci akimiyeti tarafından aqlarnıñ bozuluvı aqqında aytmağa sebep olur», – dedi o Qırım.Aqiqat yayınınıñ efirinde.
Onıñ aytqanı kibi, Meclis yasaq etilse, onıñ gizli sürette ya da qıtadan çalışması mümkün olur.
Siyasiy araştırmalar ukrain mustaqil merkeziniñ eksperti Yuliya Tişçenko degeni kibi, Meclis yuridik ceetten qayd etilmegenine köre, onı yasaq etmege qıyın olur.
Qırımtatarlarnıñ milliy lideri, Ukraina halq deputatı Mustafa Cemilev programmada aytqanı kibi, al-azırda yarımadada 243 regional meclisi çalışa. Olar muntazam sürette toplaşa. Qırımtatar Milliy Meclisi, Qırım zenaatdaşları ile skypе vastası ile bağlanıp, Kiyevden toplaşuvlarnı keçire.
Oktâbr 23 künü Rusiye Federatsiyasınıñ Cemaat palatası Rusiye Baş prokuraturasına muracaat etip, Qırımtatar Milliy Meclisiniñ faaliyetini ekstremizmge teşkermege rica etti. Böyle muracaatnıñ sebeplerinden biri – Qırımnıñ Herson vilâyeti tarafından «ticariy» qamaçavı oldı. Qırımnıñ rusiyeli prokurorı Natalya Poklonskaya Meclisniñ «ekstremist teşkilât» olaraq tanılacağını ve faaliyetiniñ yasaq etilecegini nazarda tutqanını bildirgen edi.
Rusiye Qırımnı 2014 senesi baarde işğal etkeninden soñ, qırımtatarlarnıñ yetekçileri Refat Çubarov ve Mustafa Cemilevge yarımada kirişini beş yılğa yasaq ettiler.
