Kiyevde Rusiye Federatsiyası elçihanesi yanında keçirilgen narazılıq numayışınıñ iştirakçileri yüzlerini beyaz kâğıtlar ile qapatıp, böyleliknen qırımlılarnıñ yañı akimiyet ögünde qorqusını kösterdiler. Bunı aqşam efirinde Qırım.Aqiqat Radiosınıñ aqşam efirinde Ukraina haber siyaseti naziriniñ keñeşçisi Emine Ceppar bildirdi.
Aytqanı kibi, faallerniñ qapalı yüzleri Qırım sakinleri, qırımatatarlarnıñ ve «şimdi yarımadada rusiyeli akimiyeti tarafından repressiyalarğa oğrağan» insanlarnıñ qorqusını temsil ete.
«İndemez mevam edi. Biz, böyleliknen, şimdi yarımadanı qaplap alğan qorqunı, anda yaşağan ve Qırım ile alâqası olğanlarnıñ qorqusını köstermege areket ettik. Qırımlılar öz noqtaiy nazarını, siyasiy mevamını, yani Qırım Ukraina olğanını serbest aytmağa qorqalar», – dey Emine Ceppar.
Ukraina haber siyaseti naziriniñ Qırım işlerinden keñeşçisi şunı da qoştı ki, şimdilik Rusiyede qırımtatarlarnıñ aqları bozula. Ukrainada ise, aksine, qırımtatar halqına ğayet müsbet şekilde davranalar.
«Ukraina qırımtatarlarğa öyle müsbet şekilde iç bir vaqıt yanaşmay edi. Tamır halqlarınıñ aqları boyunca BMT beyannamesi bizni öz-özümizni belgilev aqqımızğa yaqınlaştırdı. Ümüt etem ki, mında siyasiy irade endi Poroşenko prezidenti tarafından da seslendirildi, ve onıñ ameliyatqa keçecegine de ümüt besleymiz», – dep yekün çekti Ceppar.
Ukraina prezidentiniñ qırımtatar halqı işlerinden vekâletlisi, qırımtatarlarnıñ milliy lideri Mustafa Cemilev cuma künü üyleden soñ Kiyevdeki Rusiye Federatsiyasınıñ elçihanesi yanında ötkerilecek barışıq narazılıq aktsiyasına kelmege çağırğan edi. Aktsiya devamında «Qorqu yarımadası» fleş-mobı keçti.
Qırım Rusiye tarafından işğal etildi. Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.
