Link açıqlığı

Meclis Qırımda Birleşken Milletler Teşkilâtınıñ insan aqları monitoring missiyasını meydanğa ketirmege talap ete


Qırımtatar Milliy Meclisiniñ reisi Refat Çubarov Birleşken Milletler Teşkilâtını Qırımda insan aqlarını nezaret etüv halqara missiyasını meydanğa ketirmege çağırdı. Bunı Çubarov cuma künü, noyabr 6-da, Kiyevdeki Rusiye Federatsiyasınıñ elçihanesi yanındaki narazılıq aktsiyasında bildirdi.

«İşğalni toqtatacaq birinci adımlar – Qırımda daimiy monitoring missiyası, insan aqlarını nezaret etüv missiyası olmaq kerek. Böyle bir qarar Birleşken Milletler Teşkilâtında qabul etilmek kerek. Baş Assambleyanıñ bu topraq bizim olğanını tasdıqlağan rezolütsiyası bar. Amma kimse anda ne olğanından haberdar degil. Russia Today köstergenlerinden ğayrı», – dep ayttı Çubarov.

Bundan ğayrı, aktsiya iştirakçileri Rusiye Federatsiyasından siyasiy mabuslarnı azat etmege talap ettiler.

«Qorqu yarımadası» adlı flash mob Qırımda boysunmağan ve azatlığını qorçalağanlarğa qarşı qorquzuvlarnı ifadeledi.

«Maskalı adamlar qora boyu turdılar. Olar aytmağa qorqalar, açıq aytmağa qorqalar, Qırım Ukraina olğanını aytmaqtan qorqalar. Çünki ya Qırımğa kiremezler, ya da siyasiy sebeplerden taqip etile bileler. Qırımdaki qorqu müiti belli», – dep ayttı Ukraina haber siyaseti naziriniñ Qırım boyunca mesleatçısı Emine Ceppar.

Kiyevdeki Rusiye elçihanesi yanında basqılarğa qarşı bir qaç aktsiya keçirilgen edi. Elçihane tarafından bir de bir cevap olmadı.

Ukraina prezidentiniñ qırımtatar halqı işlerinden vekâletlisi, qırımtatarlarnıñ milliy lideri Mustafa Cemilev cuma künü üyleden soñ Kiyevdeki Rusiye Federatsiyasınıñ elçihanesi yanında ötkerilecek barışıq narazılıq aktsiyasına kelmege çağırğan edi.

Qırım Rusiye tarafından işğal etildi. Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti.

XS
SM
MD
LG