«Qırım» regionlarara cemaat areketiniñ temsilcisi Murat Yazıciyevniñ qırımtatarlar içün milliy devletçilikten vazgeçmek kibi ğayesi şaşıracaq bir şey degil. Sovet zamanları bu aqta qırımtatar halqınıñ duşmanları defalarca aytqan edi.
Bu aqta Qırım.Aqiqatqa Qırımtatar Milliy Meclisiniñ Tış alâqalar bölüginiñ reberi Ali Hamzin bildirdi.
«Qırımtatarlarğa sürgünlikten evel milliy muhtariyet şeklinde olğan qırımtatar devletçiliginden vazgeçmek ğayesi aqqında aytacaq olsaq, halqımıznıñ duşmanlarında daima bar edi. Bu ğaye şaşırtacaq bir şey degil», – dey o.
Hamzin dey ki, «Rusiye I Petr yolbaşçılığında daa ayaqqa turmağan vaqıtta, ukrainlerde o iç te olmağanda», qırımtatarlarnıñ devletçiligi endi bar edi.
Meclis temsilcisi aytqanı kibi, Yazıciyevniñ beyanatı açıq-aydın degil ve aqiqaten «bu şaraitlerde milliy devletçilik ğayesi manasız» olğanını bildire. «Müellif Rusiye şaraitlerini nazarda tuta», – dey Hamzin.
«Aqlı olğanını tanımaq kerek. Rusiyede qırımtatarlarnıñ milliy problemasına böyle yanaşuv olğanda, Rusiye Federatsiyası prezidentiniñ Qırımdan sürgün olunğan bir de bir beş halqnıñ aqlavı aqqında añlaşılmağan fermanını nazarğa alsaq, kerçekten de milliy devletçilikniñ ğayrıdan tiklenüv ğayesi imkânsız ola. Bildirüviniñ esas manası budır, bayraq altında birleşmek ğayesi, sanki, biz rusiyelimiz, şeytandandır», – dey o.
«Qırım» regionlarara cemaat areketiniñ prezidium azası Murat Yazıciyev qırımtatarlarğa milliy devletçilik ğayesinden vazgeçmege ve özlerini Rusiye vatandaşları sayıp, bundan ğururlanmağa teklif etti.
«Qırım» cemaat areketiniñ reberi – Qırım Devlet şurasınıñ reis muavini Remzi İlyasov.
Ukraina Yuqarı Radası 2014 senesi fevral 20 kününi Qırımnıñ muvaqqat işğaliniñ başlanuv tarihı olaraq belgiledi. Ğarp memleketleri Qırım işğalini tanımay ve bir sıra iqtisadiy cezalarnı kirsete. Rusiye yarımadanıñ işğalini red ete ve bunı «tarihiy adaletniñ qaytarılması» olaraq adlay.
