Yuqarı Radada deyler ki, «Qırım» serbest iqtisadiy zonasınıñ lâğu etilmesi Ukrainanıñ QMC territoriyasından vazgeçüvi manasında kelecek. Bu kibi fikirni «Blok Petra Poroşenko» parlament firqası reberiniñ muavini İgor Kononenko bildirdi.
Onıñ sözlerine köre, Qırım teşebbüsçileriniñ «Qırım» SİZnıñ lâğu etilmesi ile bağlı talabı Ukrainada yuqarı seviyede ögrenile ve siyasiy qararnıñ alınmasını talap ete.
«Qırım ile serbest iqtisadiy zonası aqqında qanun leyhasınıñ lâğu etilmesi bizim bu territoriyadan vazgeçecegimiz manasında kelecek, şunıñ içün mında diger siyasiy qararlarnı almaq kerek, bir taraftan anda tesirni arttırmaq ve qırımtatarlar boyunca olğan mevamnı belgilemek… Başqa taraftan, bu territoriyada Ukraina vatandaşları yaşay, olarnı qaytarmaq isteymiz», – dedi Kononenko jurnalistlerge parlamentte.
Sentâbr 20 künü Qırımğa aşayt malları ile qatnağan yük maşinalarınıñ qamaçavı boyunca Qırımtatar Milliy Meclisiniñ aktsiyası başlandı. Aktsiya idare şurasınıñ malümatına köre, memuriy sıñırdan yolcular ve yengil naqliyat maniasız keçecektirler.
Qamaçav teşebbüsçileri degeni kibi, ukrain şirketleri Qırım ile ticariy munasebetni toqtatmaq kerek, çünki yarımada territoriyası Rusiye Federatsiyası tarafından işğal etilgen. Teşkilâtçılarnıñ malümatına köre, olarnıñ talapları yerine ketirilmegence, qamaçavnı toqtatmaycaqlar, yani siyasiy mabüslerniñ azat etilmesi, mustaqil matbuat vastalarına basqı kösterilmemesi, yarımadağa halqara nezaretçilerniñ kelmesi, qırımtatarlarğa qarşı areketlerniñ toqtatılması ve ilâhre.
Ukraina Yuqarı Radası 2014 senesi fevral 20 kününi Qırımnıñ muvaqqat işğaliniñ başlanuv tarihı olaraq belgiledi. Ğarp memleketleri Qırım işğalini tanımay ve bir sıra iqtisadiy cezalarnı kirsete. Rusiye yarımadanıñ işğalini red ete ve bunı «tarihiy adaletniñ qaytarılması» olaraq adlay.
