ATR telekanalınıñ sabıq muarriri Lilâ Bucurova bazarertesi künü, noyabr 2-de, saba evinde keçirilgen tintüvni tarif etti. Bucurova Facebook saifesinde «onıñnen bağlanmağa tırışqan er bir insandan afu sorap», şimdi de «laf etmek içün tehnikiy imkânlardan marum qalğanını» bildirdi.
«Evimde yapılğan tintüv ve onıñ «sebeplerini» izaatlamaycam. İşim öyle, bir şey yapamayım. Bir şey yapamaysıñ, şimdi Qırım öyle. Yüregim tek bir şeyden sızlay – 83 yaşında anamnıñ ne qabaatı bar, oña «yürek» ilâclarını berip, maskalı ve avtomatlı adamlarnıñ yanından ayaqyolğa ozğara edim. «Qorqma, yeter ki, qorqma» sözleri ile uyandırılğan, tañ aldı yuqudan daa sıcaq olğan 8 yaşında qız torunımnıñ ne qabaatı bar? O, episi bir qorqtı. Maña qap-qara közlerinen baqıp, «Qorqmadım», dep tekrarlasa da, «Ne içün adamlarnıñ qollarında silâ bar? Bizge ateş açacaqlarmı?», dep soradı. Bunı iç bir vaqıt unutamam», – dep yazdı Lilâ Bucurova.
Onıñ aytqanına köre, yüz bergen adise oña ukrain sınıfından rus sınıfına keçmege istemegen ve bu sebepten köteklengen oğlan torunı oğrağan vaziyetni añdırdı.
12 yaşında oğlançığımnı eski sınıf arqadaşları satqın dep köteklediler
«Yarım yıl evelsi aynısını yaşadım. Yoq, aynısını degil. Daa beterini. O vaqıt bala hastahanesiniñ ayatında turıp, torunım Ruşen olğan ameliyatnıñ neticelerini bekley edim. 12 yaşında oğlançığımnı eski sınıf arqadaşları satqın dep köteklediler. O, (bir vaqıtları) ukrain gimnaziyasınıñ talebesi olıp, ukrain sınıfında qalmağa istedi, olar ise rus sınıfına keçtiler. Ruşenniñ yımırtaçıqlarını urdılar. Öyle bir köteklediler ki, ameliyat yapmağa mecbur oldıq. Ana-babası prokuraturağa muracaat etti, lâkin o, adiseni ögrenmek içün sebep tapamadı. Menim sesimni bütün gimnaziya eşitken edi. ATR o vaqıt daa Qırımda çalışa edi, lâkin men iş imkânlarımdan faydalanıp, bunı cemaatqa aydınlatmadım. Torunım bundan soñ da başqa mektepke ketmedi, ocalar ve müdir de vazifelerine daa diqqatlı yanaşmağa başladılar, sanki. Amma bunı iç bir vaqıt unutamam», – dep ayttı Lilâ Bucurova.
«Tünevin 57 yaşımnı toldurdım. Esas şeyler belgilengen bir yaş. Menim eki müim şeyim bar – Vatanım (tek Qırım degil, bütün halqım) ve qorantam. Olarnı avtomatlarnen qorquzmañız!», – dep yazdı ATR telekanalınıñ sabıq muarriri.
Noyabr 2-de saba Qırımda ATR telekanalınıñ sabıq hadimleri Lilâ Bucurova, Elzara İslâmova ve telekanal saibi Lenur İslâmovnıñ ana-babası yaşağan evleri, em de Moskvadaki evinde tintüvler yapılmağa başladı.
Qırımnıñ Rusiye Federal havfsızlıq hızmeti (FSB) idaresiniñ malümatına köre, tintüvler ATR saibine qarşı açılğan cinaiy iş çerçivesinde keçirile.
Noyabr 2-de saba Rusiyeniñ Merkeziy bankı İslâmovğa ait OOO «Cast Bank» müessisesiniñ litsenziyasını lâğu etti. Qırımtatar iş adamınıñ Qırım.Aqiqatqa bildirgenine köre, bu tedbirlerni Qırım qamaçavı ile bağlay. O, onıñ teşkilâtçılarından biri ola.
Ukraina İçki işler nazirligi Qırımda insan aqlarınıñ bozulması boyunca eki cinaiy taqiqatqa başladı
Ukraina İçki işler nazirligi ATR qırımtatar telekanalınıñ müdiri Lenur İslâmov ve telekanalnıñ sabıq hadimleriniñ evlerinden keçirilgen tintüvler, em de Qırım işğaline qarşı çıqqan cemaat teşkilâtlarınıñ faaliyetine keder etüv kibi insan aqlarınıñ bozulması boyunca eki cinaiy taqiqatqa başladı.
Ukrain nazirliginde berilgen malümatqa köre, cinayet malümatları mahsus bazağa kirsetildi. Sentâbr 20-de qırımtatar liderleriniñ teşebbüsi ile Qırımğa aşayt mahsulatı ve mallarını alıp ketken yük naqliyatını blok etüv aktsiyası başladı.
