Link açıqlığı

Saatnıñ esas haberi

İslâmov FSB tintüvleri aqqında: maña ve ticaretime ücüm


ATR telekanalınıñ saibi Lenur İslâmov dey ki, Qırımda telekanal hadimleriniñ evlerinde, yarımadada ve Moskvada yaşağan tuvğanlarınıñ evlerinde noyabr 2 künü keçirilgen saba tintüvleri – «oña ve ticaretine planlaştırığan ücümdir». İslâmovnıñ fikrine köre, işbu areketler – onıñ Kremlge qarşı mevamınıñ neticesi ve onıñ tarafından teşkil etilgen Qırım qamaçavına cevaptır.

Bu aqta o Qırım.Aqiqatqa bildirdi.

«Büyük miqyaslı ücüm azırlanılğanı aqqında malümatımız bar edi ve onı er ceetten başladılar. Şimdi bütün şirketlerni elge keçirmege tırışacaqlar. Moskva ve Qırımdaki bankımnıñ lizentsiyasını qaytardılar. Evel planlaştırılğan sistema boyunca areket etecekler. Men ile bağlı er şeyge basqı etecekler. Soñra meni halqara terrorist olaraq tanıtacaqlar», – dey o.

İslâmovnıñ fikrine köre, bu «Qırım boyunca Putinniñ oyun qaidelerini qabul etmegeni sebebinden intiqamdır».

«Teşkil etilgen vatandaşlıq qamaçavı, ondan soñ Qırım buña dayana ve Rusiye istisalcısı öz kârını arttırır degen laflarnı alayıq, Rusiyeniñ buña cevabını köresiñiz endi. Vatandaşlıq qamaçavı çalışa, demek», – dey İslâmov.

Evel noyabr 2 künü Qırımda ATR telekanalınıñ hadimleri, İslâmovnıñ ana-babasınıñ evinde ve Moskvadaki oğlu yaşağan evinde keçirilgen tintüvler aqqında bildirilgen edi. Birazdan tintüvler İslâmovnıñ bütün şirketlerinde FSB tarafından oña nisbeten açılğan cinaiy işniñ çerçivesinde keçirilgeni aqqında malümat peyda oldı.

Media-holdingge kirgen ATR, Lâle telekanalları, «Lider FM» radiosı kibi, «Meydan» radiostantsiyası da 2015 senesi aprel 1-de işğal etilgen Qırımda yayınlavını toqtattı. İyün 17-den ATR ve Lâle Kiyevden işlemege başladı, «Meydan» radiosını internetten diñlemege mümkün oldı.

Şimdi İslâmov qıtaiy Ukrainada yaşay ve sentâbr 20 künü başlanğan Qırım qamaçavınıñ teşebbüsçilerinden biri ola.

Ukraina Yuqarı Radası 2014 senesi fevral 20 kününi Qırımnıñ muvaqqat işğaliniñ başlanuv tarihı olaraq belgiledi. Ğarp memleketleri Qırım işğalini tanımay ve bir sıra iqtisadiy cezalarnı kirsete. Rusiye yarımadanıñ işğalini red ete ve bunı «tarihiy adaletniñ qaytarılması» olaraq adlay

XS
SM
MD
LG