Ukraina Tış işler naziri Pavlo Klimkin dey ki, Qırımnıñ Ukraina nezareti altına cenk yolunen qaytarılması – imkânsızıdır.
Bunı o oktâbr 23 künü çıqqan «Segodnâ» gazetasındaki intervyüsinde bildirdi.
«Rusiye kibi özek devletine qarşı arbiy areketlerni kimse başlamaz. Tek Ukrainanı aytmayım», – dey Klimkin.
Bunıñ ile o dey ki, Qırım mevzusı kün tertibinde qalacaq.
«Qırım boyunca, menimce, iç bir munaqaşa olamaz. <…> Qırım işğali iç bir vaqıt tanılmaz. Siyasetçiler ile laf etem, (dünyada) dost ve şeriklerim çoq. Qırımnı tanımaq kibi lafnı kimseden eşitmedim. Avropada, AQŞda böyle bir siyasetçi de yoq… Qıtayda eşitmedim… Qırımda insaniy vaziyet qıyın, insan aqları bozula. BMT ya da Avropa Şurasınıñ Qırımğa kirmesi içün küreşem, anda vaziyetni nezaret etsinler – bu, kerçekten de, qıyın. Qırım boyunca ileride yapılacaq adımlarımız bellidir», – dedi o.
Ukraina Yuqarı Radası 2014 senesi fevral 20 kününi Qırımnıñ muvaqqat işğaliniñ başlanuv tarihı olaraq belgiledi. Ğarp memleketleri Qırım işğalini tanımay ve bir sıra iqtisadiy cezalarnı kirsete. Rusiye yarımadanıñ işğalini red ete ve bunı «tarihiy adaletniñ qaytarılması» olaraq adlay.
