Qırım qamaçavı aktsiyasınıñ iştirakçileri yarımadağa taba ketken maşinalarnı teşkerip, ukrain qanunlarını boza. Bunı «Yol nezareti» leyhasınıñ faali Aleksey Zadorojnıy Qırım.Aqiqat Radiosınıñ aqşam efirinde bildirdi.
«Böyle areketlerde cinaiy cinayet alâmetleri bar – göñülli batalyon temsilcilerine vekâletlerniñ berilmesi. Qanuniyetke köre, naqliyat vastalarını, yolcu, aydavcılarnı toqtatmaq, teşkermek kibi aq yalıñız yol areketini nezaret etken devlet organlarınıñ hadimlerinde bar», – dey o.
Onıñ sözlerine köre, vatandaşlar, aqları bozulsa, uquq qoruyıcı organlarğa – MVD, prokuratura, SBU – muracaat etmeli.
ATR qırımtatar telekanalınıñ müdir muavini, qamaçav idarecilerinden biri Ayder Mujdabayev qamaçav iştirakçileriniñ bu kibi areketlerini añlatır eken, anda aktsiya başlanuvından berli tarikler beklenilgeni aqqında bildirdi. «Anda başlanuvdan berli tariklerni bekleyler. Biri granata ketirip, blokpostqa atacağını bekley ediler», – dey o.
Mujdabayev Qırımğa yol alğan vatandaşlar ve qamaçav iştirakçileri arasında olğan ziddiyetlerni ciddiy dep saymay.
«Üç ufaq ziddiyet oldı. Bu qadar… Zulum degil, aylarnen muzakere etilecek bir şey yoq edi… Ufaq-tüfek ziddiyetlerdir», – qayd etti qamaçav teşkilâtçılarından biri.
Em şunı da bildiri ki, «neravlanğan» iştirakçiler Qırım kirişinde teşkerüvlerden çetleştirilgen.
«Bir buçuq yıl devamında qırımtatarlarnı zorlaylar, cinaiy taqiplernen qıynaylar, memuriy taqipler, bu aqta laf eteyik. Qapalı bagajnik sebebinden yigirmi daqqa laf etmege azır olğanlardan nefret duyam. Olar qırımtatarlar, anda apiste yatqan Ukraina vatandaşları ile olğanı aqqında otuz saniye bile laf etmege azır degiller. Bu, fikrime köre, ahlâqsız, maneviysizdir», – dey o.
Sentâbr 20 künü Qırımğa aşayt malları ile qatnağan yük maşinalarınıñ qamaçavı boyunca Qırımtatar Milliy Meclisiniñ aktsiyası başlandı. Aktsiya idare şurasınıñ malümatına köre, memuriy sıñırdan yolcular ve yengil naqliyat maniasız keçecektirler.
Qamaçav teşebbüsçileri degeni kibi, ukrain şirketleri Qırım ile ticariy munasebetni toqtatmaq kerek, çünki yarımada territoriyası Rusiye Federatsiyası tarafından işğal etilgen. Teşkilâtçılarnıñ malümatına köre, olarnıñ talapları yerine ketirilmegence, qamaçavnı toqtatmaycaqlar, yani siyasiy mabüslerniñ azat etilmesi, mustaqil matbuat vastalarına basqı kösterilmemesi, yarımadağa halqara nezaretçilerniñ kelmesi, qırımtatarlarğa qarşı areketlerniñ toqtatılması ve ilâhre.
