Qırımda oktâbr 5 künü Eski Qırım iş adamı, 55 yaşında metsenat Ebazer Emiraciyev vefat etti. Qırım Musulmanları Diniy İdaresi ve şahsen Müfti hacı Emirali Ablayev аile, tuvğanlarına taziye bildirdi.
Ebazer Emiraciyev Eski Qırım şeerinde «Can yürekten» hayriye fondunıñ tesisçi ve prezidenti, qırımtatar tiliniñ inkişafına yönelgen Eşref Şemi-zade adına mukâfatnıñ tesisçisi edi.
«Can yürekten» fondunıñ esas maqsadı – qırımtatar tiliniñ, milliy tasil ve ruhiy qıymetlerniñ saqlanuvı ve inkişafı. Fond Ebazer Emiraciyevniñ esabına çalışa edi.
Ebazer Emiraciyev 1960 senesi mayıs 15 künü Özbek SSC Andijan vilâyetiniñ Cenübiy Alamışik qasabasında doğdı. 1979 senesi Andijan muzıkalı oquv yurtunı, 1985 senesi – Frunze şeerinde Qırğız sanaat institutını bitire.
1989-1990 seneleri – Eski Qırımda qırımtatar milliy medeniy merkeziniñ reberi. 1990-1992 seneleri – «Agarmış» ufaq şirketiniñ müdiri. 1992-1997 seneleri – Ukr-Tür «Emirtaş» şirketiniñ baş müdiri. 1997-1998 seneleri – Qırım Yuqarı Şurasınıñ deputatı.
Cenaze-namaz oktâbr 6 künü saat 14:00 Eski Qırımda qılınacaq, deyler Qırım Musulmanları Diniy İdaresinde.
