Bazarertesi künü, sentâbr 28-de, Aqmescitte saba raatlıq künleri «acele» tibbiyet yardımı stantsiyasına silâlı erkekniñ ücümi neticesinde elâk olğan tibbiyet adamları ile vedalaşalar.
Qırım.Aqiqatnıñ mühbiri bildirgeni kibi, vedalaşuv ücüm yüz bergen «acele» yardım stantsiyasınıñ azbarında keçirile. Elâk olğan Tatyana Kotkova ve İrina Suhannik ile vedalaşmaq içün bir qaç yüz insan keldi. Zenaatdaşları merasimge Aqmescit şeeri ve rayonından kele. Vedalaşuv yeri matem çeçekleri ile tolu. Territoriyanı uquq qoruyıcılar ve «samooborona» qoruy.
Mında Qırımnıñ rusiyeli ükümetiniñ baş nazir muavini Ruslan Balbek ve Qırımnıñ Devlet milletler komitetiniñ başı Zaur Smirnov keldi.
Merasimden soñ tibbiyet adamlarını şeer mezarlığında defn etecekler.
Cumaertesi künü, sentâbr 26-da, av tüfegi ile silâlanğan erkek Aqmescitte Sevastopolskaya soqağında yerleşken «acele» yardım binasına kirip, hastahaneniñ dört hadimine ateş açtı. Eki hadim elâk oldı. Yaralanğan feldşer bazar kününe keçer gecesi ameliyattan keçti, alı ağır. Ücüm etici vaqia yerinden maşinağa oturıp qaçtı. Birazdan uquq qoruyıcıları bildirgeni kibi, ücüm etken – Aqmescit sakini 1960 senesi doğğan Bekir Nebiyevdir. Qıdıruv alıp barıla.
Qırımnıñ rusiyeli başı Sergey Aksenov elâk olğan qadınlarnıñ ailelerine ve zarar körgenlerge maliyeviy yardım kösterilecegini vade etti.
