Link açıqlığı

Saatnıñ esas haberi

Refat Çubarov qamaçav aqqında: Zor künler daa ögde


Meclis reisi Refat Çubarov Qırımtatar Milliy Meclisi tarafından teşkil etilgen Qırımnıñ aşayt qamaçavında Ukraina devleti ve «Pravıy sektornıñ» rolü, Qırım akimiyetiniñ cevabı ve iş adamlarınıñ «beyaz» cedveli aqqında Qırım.Aqiqatqa tarif etti.

– Qırım qamaçavında devletniñ rolü nasıl?

– Devletniñ iştiraki şimdilik o qadar müim degil, meni daa ziyade ukrain cemaatınıñ qoltutuvı meraqlandıra. Bu meselede men ğayet raatım, aktsiyağa o qadar qoltutmasalar da, onıñ manasını añlaylar. Qayd etmek isteyim ki, soñki künleri bazı ekspertlerniñ fikir-tüşüncelerini közetip, olar aktsiya başlamazdan ilân etmegenimiz maqsatlarnı añladılar ve vazifelerimizni kördiler. Şimdi deyler ki, Meclis ve qırımtatarlar sayesinde qamaçav umumukrain aktsiyasına çevirilip, Qırım meselesini ekinci-üçünci sıradan birinci sırağa keri qaytara. Böylece qırımtatarlar muzakere esnasınıñ tam subyeti olalar, bu esnas ise, tahminlerge köre, işbu aktsiyadan çıqacaq diger adımlar neticesinde başlana bile. Doğrusını aytayım: bu maqsadımız da bar edi.

Bizim kibi köçmege mecbur olğanı bazı tanışlarım bizge qoltutmadılar ve, aksine, qarşı çıqtılar

Aynı vaqıtta meni bir şey taaciplendirdi, bizim kibi köçmege mecbur olğanı bazı tanışlarım bizge qoltutmadılar ve, aksine, qarşı çıqtılar. Tabiiy ki, soyadlarını aytmağa istemeyim. Bazıları Qırımda olğanda da özüni demokrat, uquqçı dep adlandıra ediler, lâkin qırımtatarlarnıñ vaziyeti aqqında ya da qırımtatar meselesiniñ al etilmesi aqqında laf ketkende saqlana ediler.

Başqa şey meni daa ziyade şaşırttı: bizge ücüm etmege başladılar, körüne. Mında pahıllıq ya da reqabetke yer yoq. Mında çoq iş bar. İçtimaiy ağlarda ve kütleviy haber vastalarında «Pravıy sektor» ile beraber olmamıznı aydınlatqan malümatnı qıdırmağa tırışqanlarğa men böyle aytam: «Birisini begenmegen olsañız, mında keliñiz, olardan yahşı oluñız, mında olğanıñıznı körsinler».

– «Pravıy sektor» Petro Poroşenkonıñ rejimine qoltutmay...

– Bu aktsiyanıñ Petro Poroşenkoğa nasıl yanaşqanları ile alâqası yoq. Bu eñ büyük ukrain belâsı, – Ukraina müim bir şeyni belgileycek olğanda er vaqıt böyle vaziyetke oğray, – ukrainler, bir çoq qırımtatarı kibi, bir ğaye etrafında toplaşıp olamaylar. Ükümet, Poroşenko ve digerleriniñ ne alâqası bar? Bizim içün bir mesele bar – işğalden azat etüv. Ayttıq: «Qırımnıñ azat etilmesini isteseñiz, keliñiz ve bizlernen oluñız». Yalıñız «Pravıy sektor» degil, Qırımdaki arqadaşlarım, olarnıñ arasında gençler çoq ve olar yarın daa faal olıp, meşur cemaat erbapları ola bileler. Seni davet etmeyip, yalvarsalar, çette qalmaq mümkün degil. «Pravıy sektor» – Qırımnıñ keri alınmasına qoltuta, Rusiye cenkini toqtatmaqnen beraber oña qarşı çıqmamıznı istey – bizni bu birleştire, qalğanı menim içün şimdilik müim degil.

– Qamaçav ilân etilgen soñ prezident Poroşenko ile laf ettiñizmi?

– Bugün meni doğğan künüm ile hayırladılar. Qamaçav aqqında laf etmedik, epimiz Ukrainağa hızmet etkenimizni ayttıq.

– Qırımğa aşayt malını alıp ketecek iş adamlarınıñ cedveli ne vaqıt taqdim etilecek?

Bugün cedvel basılacaq, ve bizler iş adamlarını bizge qoltutmağa çağıramız

– Al-azırda bir çoq aydavcı bir tarafnı bekleyler – iş adamlarını. Tünevin bizler «Maydan inostrannıh del» ekspertleri ile olarğa nasıl etip muracaat etmemiz mümkün olğanını muzakere ettik. Zenaatdaşımnıñ aytqanına köre, bugün cedvel basılacaq, ve bizler iş adamlarını bizge qoltutmağa çağıramız.

– Qırım işğalci akimiyetiniñ bugünki aktsiyağa munasebetini nasıl izaatlar ediñiz?

– Şimdilik yayğara bizge çirkin laf atmağa, şaqa etmege, qıtlıqnı is etmeyceklerini añlatmağa tırışqan delini añdıra. Bizler Qırım bazarlarında vaziyetni bilemiz. Doğrusını aytqanda, işğalci akimiyet qamaçavğa resmiy munasebetini bildiremiz, bunı Moskva yapacaq. Tünevin baş nazirniñ muavini Kozak bizim aktsiyamızğa onıñ başlanmasından evel azırlıq körgenlerini ayttı.

– Qırımnıñ aşayt qamaçavı planlaştırılğanı kibi devam etemi?

– Birinci eki kün tınç keçti, amma bu daa başlanğıç. Menim fikirimce, zor künler daa ögde. İş adamları yalıñız yüklengen maşinalarnı açmaycaqlar, tizgen shemalarını bozacaqlar. Mında pek vatanperver olmaq kerek. Olar buña razı olsalar – ileride de tınç olacaq, yoqsa – qıyın olacaq.

XS
SM
MD
LG