Qırımğa qıtaiy Ukrainadan aşayt malı ketirilmesiniñ blok etilüvi boyunca aktsiya iştirakçileri öz areketlerini qamaçav olaraq adlamay. Qırım.Aqiqat mühbiri degeni kibi, narazılar aktsiyanı «Çonğarda Qırım Maydanı» olaraq adlaylar.
«Qanda qurulğan bizneske keder etmesi – qamaçav degil. Bilgenime köre, Qırımğa ketirilgen aşayt malınıñ 80% anda qalmay, Krasnodar diyarına yollanıla, ya da doğrudan arbiy qısımlarğa ketirile. Bu vatandaşlıq aktsiyası vastası ile özlerini Ukraina vatandaşı olaraq tanığan Qırım sakinlerine olarnı qıtaiy Ukrainada unutmadılar demege çalışamız. Em de namussız iş adamlarına bir buçuq yıl devamında saylamağa mümkün olğanını köstermek: keder üstünde qurulğan ticaretke devam etmek, ya da tek aqça degil de, namusnıñ da olmaq kerekligini hatırlamaq. Ve, elbette ki, ukrain akimiyetiniñ diqqatını celp etmek», – dedi Qırım.Aqiqatqa ukrain ve qırımtatar kinoaktörı, stsenarist, Qırım Muhtar Cumhuriyetiniñ nam qazanğan artisti, «1+1» telekanalında «Cesür yürekler» programmasınıñ alıp barıcısı Ahtem Seytablayev.
Onıñ fikrine köre, işbu aktsiyanıñ strategik devam ola bile. Şu cümleden, «Qırım» serbest iqtisadiy zonası aqqında qanun lâğu etilmek, ukrain-qırımlılarnıñ aqlarını qoruycaq qanun çıqarıcı senetler qabul etilmek, Qırımda qırımtatar toponimikası qaytarılmaq kerek. Talaplar arasında – qırımtatar halqı sürgünliginiñ genotsid olaraq tanılması.
Sentâbr 20 künü Qırımğa aşayt malları ile qatnağan yük maşinalarınıñ qamaçavı boyunca Qırımtatar Milliy Meclisiniñ aktsiyası başlandı. Aktsiya idare şurasınıñ malümatına köre, memuriy sıñırdan yolcular ve yengil naqliyat maniasız keçecektirler.
Qamaçav teşebbüsçileri degeni kibi, ukrain şirketleri Qırım ile ticariy munasebetni toqtatmaq kerek, çünki yarımada territoriyası Rusiye Federatsiyası tarafından işğal etilgen. Teşkilâtçılarnıñ malümatına köre, olarnıñ talapları yerine ketirilmegence, qamaçavnı toqtatmaycaqlar, yani siyasiy mabüslerniñ azat etilmesi, mustaqil matbuat vastalarına basqı kösterilmemesi, yarımadağa halqara nezaretçilerniñ kelmesi, qırımtatarlarğa qarşı areketlerniñ toqtatılması ve ilâhre.
Qırımnıñ rusiyeli akimiyeti böyle areketlerni takbih ete, amma yarımada sakinleri erzaq qamaçavınıñ aqibetlerini duymaz, dep tüşüne.
