Link açıqlığı

Qırım ile memuriy sıñırda qırımtatarlarnıñ yetekçileri tarafından başlanılğan erzaq qamaçavı neticesinde Rusiye şirketleri kâr köre. Bunı Kiyevde matbuat konferentsiyasında «Ukrainanıñ yüzümci ve şarapçıları» birliginiñ müdiri, agrar saasındaki ekspert Sergey Mihayleçko bildirdi.

Mihayleçko dey ki, özü qamaçav tarafdarı degil ve bu kibi areketlerden müsbet neticelerni beklemey eken.

«İlân etilgen maqsatlarnı böyle usullar ile yerine ketirmege imkânsız, bunı añlaymız. Rusiye siyasetine böyleliknen qarşılıq köstermege, onı deñiştirmege acet yoq, Rusiyege bütün dünya qarşı. Bundan kim qazana? Qırımda fiyatlar köterile deyler… Rusiye degil, Qırım sakinleri zarar köre, şimdi yarımadağa mal ketirgen Rusiye şirketleri ise kâr qazana. Yani, güzel şiarlar ile yapılğan areketlerden bazıları qazana, Qırım vatandaşları çekişe, qoyulğan maqsatlar ise böyle vastalar ile yerine ketirilmez», – dey yekspert

Aytqanı kibi, böyle aktsiya siyasiy «piar» içün keçirile, onıñ keçirilüv vaqtı saylavlarğa bağlı. Sözlerine köre, işbu aktsiya mevsimden aqça qazanğan iş adamlarına zarar ketire. Em de bu kibi aktsiyalarnıñ peyda oluv sebebi – işğal etilgen Qırım ile bağlı devlet programmasınıñ olmamasıdır eken.

«Qayda ketkenimiz ile bağlı muayyen programmamız olmağance, böyle areketlerge rastkelecekmiz. Programmasız yapılğan areketler er vaqıt menfiy aqibetlerge ketire», – dey ekspert.

Sentâbr 20 künü Qırımğa aşayt malları ile qatnağan yük maşinalarınıñ qamaçavı boyunca Qırımtatar Milliy Meclisiniñ aktsiyası başlandı. Aktsiya idare şurasınıñ malümatına köre, memuriy sıñırdan yolcular ve yengil naqliyat maniasız keçecektirler.

Qamaçav teşebbüsçileri degeni kibi, ukrain şirketleri Qırım ile ticariy munasebetni toqtatmaq kerek, çünki yarımada territoriyası Rusiye Federatsiyası tarafından işğal etilgen. Teşkilâtçılarnıñ malümatına köre, olarnıñ talapları yerine ketirilmegence, qamaçavnı toqtatmaycaqlar, yani siyasiy mabüslerniñ azat etilmesi, mustaqil matbuat vastalarına basqı kösterilmemesi, yarımadağa halqara nezaretçilerniñ kelmesi, qırımtatarlarğa qarşı areketlerniñ toqtatılması ve ilâhre.

Qırımnıñ rusiyeli akimiyeti böyle areketlerni takbih ete, amma yarımada sakinleri erzaq qamaçavınıñ aqibetlerini duymaz, dep tüşüne.

XS
SM
MD
LG