Qırım ile memuriy sıñırdaki Çonğar nezaret-kiriş noqtasında yük maşinalarınıñ blok etilmesi boyunca devamlı aktsiya başlandı. Bunı bazar künü Qırım.Aqiqat mühbiri bildirgen edi.
Onıñ malümatına köre, bir yüz insan yolnı qapatıp, anda-mında yüre edi. Yengil maşina ve mikroavtobuslarnı kirsete ve yük maşinalarğa yol qapatmağa vade ete ekenler.
Aktsiyağa Ukraina prezidentiniñ qırımtatar halqınıñ işlerinden vekâletlisi Mustafa Cemilev keldi.
Aktsiya iştirakçileri memuriy sıñırnıñ yanında beton bloklarını qoyıp, blokpostnı teşkil ettiler. Mühbirimiz aytqanı kibi, yengil maşinalarnı bu bloklarnı aydap keçe bile, amma yük maşinalarğa bu manialardan keçmege zor olacaq.
Aktsiya iştirakçileri arasından Novoalekseyevka ve Herson vilâyetiniñ diger meskün yerleriniñ sakinleri, «Pravıy sektor» ve «Aydar» göñülli batalyonlarınıñ askerleri.
Sentâbr 20 künü Qırımğa aşayt malları ile qatnağan yük maşinalarınıñ qamaçavı boyunca Qırımtatar Milliy Meclisiniñ aktsiyası başlandı. Aktsiya idare şurasınıñ malümatına köre, memuriy sıñırdan yolcular ve yengil naqliyat maniasız keçecektirler.
Qamaçav teşebbüsçileri degeni kibi, ukrain şirketleri Qırım ile ticariy munasebetni toqtatmaq kerek, çünki yarımada territoriyası Rusiye Federatsiyası tarafından işğal etilgen. Teşkilâtçılarnıñ malümatına köre, olarnıñ talapları yerine ketirilmegence, qamaçavnı toqtatmaycaqlar, yani siyasiy mabüslerniñ azat etilmesi, mustaqil matbuat vastalarına basqı kösterilmemesi, yarımadağa halqara nezaretçilerniñ kelmesi, qırımtatarlarğa qarşı areketlerniñ toqtatılması ve ilâhre.
2014 senesi fevralniñ soñunda martnıñ başında Rusiyeden ve Rusiye Qara deñiz flotunıñ Qırım bölüklerinden atılğan ordular Qırım yarımadasını işğal ettiler.
2014 senesi mart 16 künü Qırım ve Aqyarda yarımadanıñ statusı aqqında «referendum» keçirildi. Onıñ neticesinde Rusiye Qırımnı öz terkibine qoştı. Ne Ukraina, ne Avropa birligi, ne de AQŞ neticelerni tanıdı ve bunı Rusiye tarafından Qırımnıñ işğali olaraq sayalar.
