Ukraina prezidentiniñ qırımtatar halqınıñ işlerindenvekâletlisi, Ukraina Yuqarı Şurasınıñ deputatı Mustafa Cemilev işğal etilgen Qırımnıñ aqiqiy vaziyeti aqqında malümatnıñ Avropa memleketlerine barıp yetmesiniñ emiyetini qayd ete.
Bunı o Avropa birliginiñ 28 memleket-azasınıñ elçileri ile körüşüvde bildirdi, haber ete vekâletliniñ matbuat hızmeti.
«Siziñ haberdar olğanıñız biz içün pek müimdir. Bunı vatandaşlarımız talap ete. Çünki şimdi serbest eyyetler Qırımnı ziyaret etip olamay», – dey Cemilev.
O, yarımada işğali devamında Qırımnı tek eki ecnebiy nezaret eyyeti ziyaret etkenini qayd etti: biri – insan aqları boyunca Avropa komissarı Nils Muižnieks reberliginde, ekinci – Türkiyeden resmiy olmağan eyyet.
«Şimdilik Rusiye Federatsiyası işğal etken yarımadağa yalıñız özü istegen gruppalarnı kirsete», – dey Cemilev.
Elçiler ile körüşüv yarım saat sürdi. Bu vaqıt içerisinde Ukraina devleti başınıñ vekâletlisi Qırımda içtimaiy-siyasiy vaziyet, yarımada ealisiniñ keyfi ve qasevetleri aqqında tarif etti.
Şu cümleden, denile beyanatta, Cemilev Qırımtatar Milliy Meclisiniñ Qırımnıñ «mal qamaçavı» ile bağlı teşebbüsini añlattı.
Qırım Rusiye tarafından 2014 senesi fevral 20 künü işğal etildi. Ukraina Yuqarı Şurası yarımadanıñ muvaqqat işğali aynı şu künü başlanğanını bildirе.
Hatırlatamız, qırımtatarlarnıñ yetekçileri Qırım ile memuriy sıñırnı blok etip, işğalci yarımadağa ukrain malınıñ ketirilmesini toqtatmaq niyetindeler. Qırımtatar halqınıñ milliy yetekçisi Mustafa Cemilev aytqanı kibi, «Ukraina Qırmınıñ işğalci rejimini temin etmemeli».
Qırımnıñ rusiyeli başı Sergey Aksenov yarımada qıtaiy Ukrainadan malnıñ ketirilmemesine bütünley azır olğanını bildirdi. Bu mevzuda «iç te qorqu olmağanını» da qayd etti.
Qırımtatar Milliy Meclisiniñ reisi, Ukraina Yuqarı Şurasınıñ deputatı Refat Çubarov sentâbr 16 künü parlament toplaşuvında bildirgeni kibi, qırımtatarlar sentâbr 20 künü, üylede, Rusiye tarafından işğal etilgen Qırımğa mahsulatnı ketirgen yük maşinalarınıñ areketini blok etmek niyetindeler.
