Qırımda, cumaaqşamı künü, sentbâr 10-da, 2015 senesi avugst soñunda ğayıp olğan qırımtatarı Muhtar Arislanovnıñ evinde uquq qoruyıcı organlarınıñ hadimleri tintüv keçirdiler.
Qırım.Aqiqatqa avdokat Emil Kürbedinov bildirgeni kibi, tintüv sebebi – insannıñ ğayıp oluvınıñ bütün versiyalarınıñ ögrenilmesidir.
«Evel olar (taqiqat hadilmeri – QA) teşkerüvni keçirgen edi – tintüv degil edi. Bütün istegen şeylerni tutıp aldılar: vesiqalarnı ve ilâhre. Yalıñız bilgisayarnı tapıp olamadılar. Bu sebepten tintüvge keldiler, onı daa da teren keçirmek içün», – dedi Kürbedinov.
Advokatnıñ sözlerine köre, tintüv soñunda Arislanovnıñ ömür-arqadaşını Qırımda Rusiye Taqiqat komitetiniñ idaresine saat 13-ke çağırdılar.
Bildirilgeni kibi, Rusiye Taqiqat komitetiniñ idaresi avgust 27 künü ğayıp olğan Muhtar Arislanovnıñ bulunuv yerini belgiley.
Malümatqa köre, «Rusiye Cinaiy kodeksiniñ 105 maddesi 1-inci qısmına köre (öldürüv) cinaiy iş taqiq etile».
«2015 senesi avgust 27 künü Aqmescit şeerinde «Zalesskiy» çarşısına çıqtı ve alâ daa qaytmadı», – deyler taqiqat komitetinde.
Matbuat vastalarınıñ malümatına köre, 45 yaşında Arislanov Aqmescit rayonı mekteplerinden birinde beden terbiyesi ocası olıp çalışa. Dzüdo idmancısıdır.
