Qırım musulmnları diniy idaresi müfti Emirali Ablayevniñ intervyüsini aşkâr etti. Müfti atqanı kibi, Qırımtatar Milliy Meclisi reisiniñ Ankara musafirhanesine ziyareti – «cemiyet fikrini idare etmek maqsadı ile azırlanılğan aktsiya» edi.
«Saba, musafirhaneden Türkiye Cumhuriyetiniñ din işleri boyunca idaresine planlaştırılğan ziyaretke çıqqanda, odamda apansızdan Lenur İslâmov (ATR telekanalınıñ saibi) peyda oldı ve bir qaç saniyeden Refat Çubarov da kelip çıqtı. Çubarov ile körüşüv bir 10 daqqa devamında ve, aytılğanı kibi, «ayaq üstünde» keçti. Onıñ kelmesi aqqında haberim yoq edi. Refat Çubarov men ile körüşmege istegeni aqta bir şey aytmağan edi. Teesüf ki, körüşüvimizniñ manasını öyle de аñlap olamadım. Çubarovnıñ monologı edi. Qırımtatarlarnı raatsız etken meselelerniñ çezilmesine tesir ete bilecek bir sualni bile muzakere etmedik», – dey müfti intervyüde.
Öz nevbetinde, Çubarov bunı izaatlap, işbu intervüniñ müftiniñ iradesine qarşı peyda ola bilmesi aqqında yazdı.
«QMDİ saytında peyda olğan metn, Müfti beyniñ razılığı ile olsa da, onıñ iradesine qarşı pedya olğanını tüşünmege ister edim. Vaqıt kelir, yalan aytmağa mecbur etken pezevenkke yerini kösterermiz», – dey Çubarov.
O, Ankarada müftiniñ yanında «FSB kuratorlarınıñ» olmasını da qayd etti.
Çubarov aytqanı kibi, onıñ yarımada kirişi Rusiye akimiyeti tarafından yasaq etilgeni sebebinden, «Müfti ise, Meclis azası olıp, Qırımtatar Milliy Meclisiniñ toplaşuvlarına kelmegeni» içün olarnıñ Ankarada körüşüvleri zaruriy edi. Aynı zamanda, dey Çubarov, müfti işğalci akimiyet tarafından teşkil etilgen «Qırım» ve «Qırım birligi» teşkilâtlarınıñ faaliyetine aktiv sürette qoşula, bu ise qırımtatarlarnıñ memnüniyetsizligini doğurmağa başladı.
