Link açıqlığı

Qırımda Kobzar eykeli yanında Ukrain medeniyet merkeziniñ vekillerini yaqaladılar – faal


Aqmescitteki Şevçenko eykeli (arhiv fotoresimi)

Aqmescitte avgust 24-te, Ukraina mustaqillik Künü, ukrain şairi Taras Şevçenkonıñ eykeli yanında Ukrain medeniyet merkeziniñ faalleri Maksim Kuzmin ve Leonid Kuzminni yaqaladılar.

Bunı olarnıñ ortağı, Ukrain medeniyet merkeziniñ daa bir vekili Veldar Şukurciyev Qırım.Aqiqatqa bildirdi.

Onıñ aytqanına köre, yaqalanğanlarnı Aqmescit rayonınıñ bölügine alıp kettiler.

«Maksim ve Leonid soy degiller, tek soyadları aynı. Olarnı tedbir keçirilmesi qaideleriniñ bozulmasından sebep yaqaladılar. Faqat anda bir de bir tedbir olmadı, olar ayrı kelip, Şevçenko eykeline çeçek qoydılar ve olarnı şu daqqası yaqaladılar», – dep ayttı Şukurciyev.

Qırım uquq qoruyıcıları bunı izaatlamaylar.

Qırım.Aqiqat bildirgeni kibi, avgust 24-te Aqmescitte Şevçenko eykeli yanında video çıqarğan «İnter» hadimlerini yaqalap, politsiyada teşkerdiler.

Raatlıq künleri Ukraina devlet bayrağı künü munasebetinen Aqmescitteki Taras Şevçenko eykeline qoyulğan çeçek demetlerini yırtıp taşladılar.

Bazarertesi künü, avgust 24-te, Ukrainada Mustaqillik künü qayd etile. 24-ünci doğğan künü munasebetinen memlekette tantanalı tedbirler keçirilecek. Eki yıldan berli bu bayram Rusiye tarafından işğal etilgen Qırımda qayd etilmey. Aqmescitteki cemaat faalleri Ukraina mustaqillik Künü munasebetinen aktsiyanı keçirecek ediler, lâkin Aqmescitniñ şeer memuriyeti buña izin bermedi.

XS
SM
MD
LG