Saba Aqmescitte ukrain şairi Taras Şevçenkonıñ eykeli yanında video çıqarğan «İnter» ukrain telekanalınıñ hadimlerini rayon bölügine alıp kettiler.
Bunı telekanal mühbiri Yuliya Krüçkova Qırım.Aqiqatqa bildirdi.
«Bizler Ukraina mustaqillik Künü munasebetinen Aqmescitte Şevçenko eykelini videoğa çıqardıq. Maşinağa qaytqanda bizni patrul hızmetiniñ hadimi toqtattı. O, video çıqarmağa izin bergen vesiqalarnı köstermege rica etti», – dep ayttı mühbir.
Onıñ bildirgenine köre, politsiya hadimi olar «İnter» telekanalınıñ hadimleri olğanını añlap, birisine telefon etti ve jurnalistlerniñ şahsiyetlerini belgilemek içün Aqmescit politsiyasınıñ Merkeziy rayon bölügine keçmege rica etti.
«Rayon bölüginde vesiqalarımıznı baqtılar, Rusiye Tış işler nazirliginde qayd olğanımıznı ve qanunğa köre çalışqanımıznı añlap, bizni azat ettiler. Bundan ğayrı, bizden afu sorap, bir daa böyle bir şey olmaycağını vade ettiler», – dep ayttı Krüçkova.
Onıñ aytqanına köre, rayon bölüginde hadimlernen laf eteceklerini, em de Qırımda kütleviy haber vastalarınıñ temsilcileri ile iş içün mahsus derslikler azırlaycağını bildirdiler. «İnter» telekanalınıñ jurnalistleri rayon bölügini terk ettiler.
Qırım uquq qoruyıcı organlarınıñ bunıñnen bağlı izaatları olmadı.
Bazarertesi künü, avgust 24-te, Ukrainada Mustaqillik künü qayd etile. 24-ünci doğğan künü munasebetinen memlekette tantanalı tedbirler keçirilecek. Eki yıldan berli bu bayram Rusiye tarafından işğal etilgen Qırımda qayd etilmey. Aqmescitteki cemaat faalleri Ukraina mustaqillik Künü munasebetinen aktsiyanı keçirecek ediler, lâkin Aqmescitniñ şeer memuriyeti buña izin bermedi.
