Link açıqlığı

Saatnıñ esas haberi

Qırım Devlet şurasından İlyasov ve Gempelni mandatsız qaldırmağa talap eteler


«Qırımtatarlarnıñ qarşılıq areketi»nde qırımtatar halqınıñ tarihiy hatırası Rusiye prezidenti Vladimir Putin içün ediye olaraq qullanılğanından çorlanalar. Avgust 17 künü Putinniñ Yaltada milliy birliklerniñ temsilcileri ile körüşüvinde bagışlanılğan «altın beşik» aqqında söz kete.

Bu sebepten «Qırımtatarlarnıñ qarşılıq areketi» «ediye etilgen timsalni lâğu etmek», bunı yapqanlarnı ise – Qırımnıñ rusiyeli Devlet şurasınıñ spiker muavini Remzi İlyasovnı ve deputat Yuriy Gempelni mandatsız qaldırmağa talap ete.

Bu aqta teşkilâtnıñ Qırım.Aqiqatnıñ elinde olğan narazılıq beyanatında aytıla.

«Qırım yarımadasında öz başına tayinlengen akimiyet ile işbirlikte bulunğan iç bir şahıs, iç bir akimiyet 1783 senesinden genotsidni yaşağan qırımtatar halqınıñ şeyleri, timsalleri, tarihiy hafızasını qullanamaz», – denile narazılıqta.

Mında şunı da qayd eteler ki, iç bir kimseniñ bu kibi timsallerni «milleti qırımtatar olmağan yat bir şahısqa, qırımtatar halqınıñ razılığı olmadan» bağışlamağa aqqı yoq, çünki bu «qırımtatar halqınıñ müelliflik aqlarınıñ bozuluvıdır», deyler teşkilâtta.

«Buña köre, «Qırımtatarlarnıñ qarşılıq areketi»niñ azaları yuqarıda añılğan deputatlarnıñ areketlerini ahlâqsız ve deputat unvanına lâyıq olmağan kibi tanıylar», – denile mektüpte.

Teşkilât Yuriy Gempel ve Remzi İlyasovdan Rusiye Federatsiyası prezidentine bağışlanğan ediyeni lâğu etmek ve onı qırımtatar müzeyine teslim etmege talap ete.

«Qırım Cumhuriyeti Devlet Şurasınıñ reisine İlyasov Remzi ve Gempel Yuriyni, qırımtatar milletiniñ degerligini şahsiy maqsatlarında qullanğanları sebebinden, mandatsız qaldırmağa», – denile Areketniñ talabında.

İlyasov ve Gempel, em de Qırım Devlet şurasından buña izaat da kelmedi.

Yaltada Rusiye prezidenti Vladimir Putinge Qırımnıñ milliy cemaat teşkilâtlarınıñ temsilcileri ile körüşüvde timsaliy Altın beşikni bağışladılar.

Qırımnıñ regional alman milliy-medeniy muhtariyetiniñ reisi Yuriy Gempel degeni kibi, bu aqta «qadimiy efsaneler» bar eken.

«Qırımda qadimiy, ğayet qadimiy bir efsane bar. Bu efsanede Qırımda saqlanılğan Altın beşik aqta söz kete, bu beşikniñ saibi – Qırım, sulh ve fikirdeşlik saibi olacaq», – dey Gempel.

Bazarertesi künü, avgust 17-de, Yaltada Rusiye prezidenti Vladimir Putin Rusiye Devlet şurası prezidiumınıñ turizm inkişafı boyunca toplaşuvını keçirdi.

Ukraina prezidenti Petro Poroşenko Rusiye prezidenti Vladimir Putinninniñ Ukraina tarafı ile uyğunlaştırılmağan Qırım ziyaretini – medeniy dünyağa qarşı areket olaraq adladı. Ukraina Tış işler nazirligi Rusiye prezidenti Vladimir Putin ve baş naziri Dmitriy Medvedevniñ işğal etilgen Qırım ziyaretine narazılığını bildirdi.

XS
SM
MD
LG