Link açıqlığı

Rusiye prezidenti Vladimir Putin Qırımnıñ milliy cemaat teşkilâtlarınıñ temsilcileri ile avgust 17 künü körüşkende, Qırımda «barışıq ve tınçlıqnıñ pekitilmesine» hususiy diqqat ayırmağa kerek olğanı aqta bildirdi.

Bu aqta Kreml saytında aytıla, haber ete Qırım.Aqiqat.

«Qırım, asılında – çoq milletli Rusiyeniñ aksidir. Mında, memleketimizde olğanı kibi, devlet ve vatandaşlarnıñ ğayretini birleştirip, barışıq ve tınçlıqnıñ pekitilüvine hususiy diqqat ayırmaq kerek», – dep bildire Putinniñ sözlerini onıñ matbuat hızmeti.

Onıñ fikrine köre, Qırımnıñ inkişafı içün «çeşit millet vekilleri arasında işanç ve fikirdeşlik müitini yaratmaq kerek».

«Onıñ probelmalarını, şu cümleden reabilitatsiyağa oğrağan halqlarnıñ meselelerini yalıñız siyasiy stabillik ve milletlerara barışıqnıñ olması şaraitlerinde al etmek mümkün», – dey Putin.

Beyanatta bildirilgeni kibi, «bu vaqıt devamında yarımadada 75 milliy-medeniy muhtariyet ve 15 milliy-medeniy birlik meydanğa ketirildi». Ne aqta söz ketkenini Rusiye prezidenti qayd etmedi, yalıñız «bu kibi strukturalarnıñ teşkil etilmesi Rusiye adeti olğanı» aqta aytıp keçti. Olarnıñ temsilcileri ise «akimiyet ile faal işbirlikte buluna, er seviyede, ve mesleat ve muşavere organlarına kire» eken.

İşbu körüşüvde Qırımnıñ rusiyeli Devlet şurasınıñ spiker muavini Remzi İlyasov, Qırım müftisi Emirali Ablayev, Aqmescit mitropoliti ve Qırım Lazari ve başqaları buluna edi.

Qırım.Aqiqatqa Qırımtatar Milliy Meclisiniñ reisiniñ birinci muavini Nariman Celâl aytqanı kibi, temsiliy organda Rusiye yolbaşçılığınıñ Qırım ziyaretini muzakere etmegen ediler ve Meclis iç bir körüşüvge davetni almağan edi.

«Meclis bu kibi teklifke nasıl seslenir edi, bilmeyim. Qırım tışında bulunğan zenaatdaşlarımız bu kibi körüşüvde iştirak etüvimizge qarşı çıqar ediler, ğaliba. Qırımda bulunğanlar ise: körüşip, laf etsek, yaramay bir şey olmaz» der edi, belki», – dey Celâl.

Rusiye prezidenti Vladimir Putin dey ki, «Qırımda, qırımtatar mevzuatını qullanıp, vaziyetni kerginleşmege tırışqanlar öz siyasiy niyetlerini amelge keçirmege ve aq-uquqlar oğrunda küreşçi olaraq halqara grantlarnı elde etmege istey»

Ukraina prezidenti Petro Poroşenko Putinniñ Qırım ziyaretini «medeniy dünyağa qarşı areket ve vaziyetniñ beterleşüvi boyunca stsenariyniñ devamı» olaraq adladı.

Ukraina Tış işler nazirligi Rusiye prezidenti Vladimir Putin ve baş naziriDmitriy Medvedevniñ işğal etilgen Qırım ziyaretine narazılığını bildirdi.

2014 senesi fevralniñ soñunda martnıñ başında Rusiyeden ve Rusiye Qara deñiz flotunıñ qırım bölüklerinden atılğan ordular Qırım yarımadasını işğal ettiler.

2014 senesi mart 16 künü Qırım ve Aqyarda yarımadanıñ statusı aqqında «referendum» keçirildi. Onıñ neticesinde Rusiye Qırımnı öz terkibine qoştı. Ne Ukraina, ne Avropa birligi, ne de AQŞ neticelerni tanıdı ve bunı Rusiye tarafından Qırımnıñ işğali olaraq sayalar.

Bundan soñra AQŞ ve Avropa Birligi Rusiyege qarşı bir sıra iqtisadiy cezalarnı kirsettiler. Ğarp Qırım Ukraina olğanını ayta.

XS
SM
MD
LG