Link açıqlığı

ATR qırımtatar telekanalınıñ saibi Lenur İslâmov oña Kiyevden yayınlanğan telekanal sebebinden kelgen qorquzuvlar aqqında tarif etti. Şu cümleden, İslâmovnı Rusiye biznesinden marum qaldıracaq olalar.

Bunı o Qırım.Aqiqatqa bildirdi.

«Er kes basqı altındadır. «Just-bank»nıñ (tesisçisi Lenur İslâmov olğan Rusiye bankı – QA) bir sıra sıñırlav, tenbiyesi bar. Bu biznesnen ne olacaq, bilmeyim, aytması bile melüldir. Añlañız, qırımtatarlarğa telekanalnı qaytarmasam, öz-özüme hainlik eter edim. Şimdi va-bank kettim: ya biznesni, ya da içtimaiy, siyasiy yönelişni saylamaq kerekim», – dedi İslâmov.

Onıñ sözlerine köre, Rusiyede bulunıp, o, atta şimdiki buhran şaraitlerinde iş adamı olaraq qala bile edi.

«Amma ATR telekanalını meydanğa ketirip, onı taşlağanımdan soñ öz-özüme ne aytacaq edim? Taşladım, çünki iş adamı olaraq aqibetlerden qorqtım. Maña açıqtan ayttılar da: Kiyevden yayınlavğa devam etseñ, artıq iş-adamı olmazsıñ. Böyle şekilde qalsañ, bir şey olmaz. Telekanal efirinde Rusiye bayrağını assañ, Rusiye tarafdarı olsañ, amanlıqta yaşarsıñ», – tarif ete ATR saibi.

Kim qorquza degen sualge böyle cevap berdi: «Qırım memuriyetinde çalışqan insanlardan başlap, Moskvada Rusiye akimiyetine qadar. Çeşit dairelerge kirgen insanlarnı maña yollay ediler, menim içün yapıla bilecek şeyler aqqında tarif ete ediler».

İslâmovnıñ aytqanı kibi, onıñ em Ukraina, em Rusiye pasportı bar, amma o yaqın zamanda birinden vazgeçmege azır olğanını bildirdi.

«Ukrainada ekileme vatandaşlıq ile problemler bar. Rusiyede böyle mesele yoq edi. Amma, añlağanım kibi, 2016 senesi yanvar 1-ne qadar qırımlılarda ekileme vatandaşlıqnıñ olması mümkün. Şimdi esas vazifem – ATRni saqlamaq. Onı becerdim. Endi biznesni saqlamağa tırışacam», – dedi o.

ATR qırımtatar telekanalı 2015 senesi aprel 1-den Qırımda işini toqtatmağa mecbur edi. 2015 senesi iyün 17-den kanal Kiyevde işlemege başladı.

XS
SM
MD
LG