İşğal etilgen Qırımda qırımtatarlarğa qarşı ayırımlar, aqlarınıñ bozuluvı çoqusını yarımadanı terk etmege mecbur ete. Bu aqta qırımtatar halqınıñ yetekçisi, Ukraian prezidentiniñ Vekâletlisi, halq deputatı Mustafa Cemilev bildire.
«Qırımtatarlarğa nisbeten merametsiz ayırım ve qanunsızlıq, gençlerniñ ğayıp oluvı ve öldürüvleri, yaşlarnıñ Rusiye ordusına mecburen çağırılması, ileride qardaş-ukrainlerge qarşı cenkke yollanılması, demokratik serbestlikniñ olmaması ve işğal etilgen Qırımda yaşlar içün istiqbalniñ olmaması insanlarnıñ çoqusını kene vatanını terk etmek ve qıtaiy Ukrainağa köçmege mecbur ete», – dedi o Türkiyeniñ paytahtı Ankarada keçirilgen II Bütündünya qırımtatar kongressinde, haber ete Qırım.Aqiqat.
Cemilevniñ sözlerine köre, al-azırda, Meclisniñ işğalge dayanmaq ve Vatannı terk etmemek çağıruvına baqmadan, Qırımnı eñ azından 10 biñ qırımtatarı terk etti.
Cemilev şunı da bildirdi ki, «Qırım baari»nden soñ yarımadağa sürgünlik yerlerinden 76 qoranta keldi, amma iç biri Qırımda yerleşmege izin alamadı, çünki «er yıllıq imtiyaz» endi bitti eken ve olar keri qaytmağa mecbur oldılar. Bunıñ ile, bundan evelki yılları Qırımğa bir yılda tahmnen 1,5-2 biñ insan qayta edi.
«Qırımtatarlarğa qarşı qanunsızlıq olarnı Qırım tışına quvmaq maqsadı ile yapılğanı ile bağlı tasavur peyda ola», – dey Cemilev.
Aynı zamanda, onıñ aytqanı kibi, Qırımğa em Rusiye, em şarqiy Ukrainada arbiy areket rayonlarından rusiyelilerniñ büyük sayıda kelmesi qayd etile. Siyasetçi Rusiye matbuat vastalarında Donetsk vilâyetinden 200 Mariupol yunanı, ermeni ve SSCB sabıq vatandaşları yeudilerniñ İsrailden köçip kelmesi muzakere etile, olarğa Qırımda er türlü amanlıqnıñ olması vade etile.
