Link açıqlığı

Cemilev Qırım havfsızlığı içün qırımtatarlarnıñ arbiy teşkilâtlarınıñ ola bilecegini red etmey


Ukraina prezidentiniñ qırımtatar halqınıñ işlerinden vekâletlisi Mustafa Cemilev, II Bütündünya qırımtatar kongressininiñ iştirakçileri ögünde çıqışta bulunıp, qırımtatar diasporasınıñ vekillerini «ukrain devletindeki ketişatlarğa faal sürette qoşulmağa çağırdı». Bu aqta Ankaradan Qırım.Aqiqat mühbiri bildire.

Mustafa Cemilevniñ sözlerine köre, o, Ukrainanıñ topraq bütünligi oğrunda olğan küreşte qırımtatar teşkilâtlarınıñ iştiraki ola bilecegini red etmey, bundan soñra işbu teşkilâtlar azat Qırım yarımadasında havfsızlıqnıñ tiklenüvinde iştirak ete bile eken.

«Biz diger azlıqlarnıñ teşkilâtları ile Hersonda yerleşmege planlaştıramız. Küreşke yönelecek arbiy birlikte iştirakimiz de mümkün. Yarımadanıñ işğalden azat etilüvinden soñ, belki de, işbu bölükler yarımadada havfsızlıqnı nezaret etecektir», – dedi Cemilev.

Ukraina prezidentiniñ qırımtatar halqınıñ işlerinden vekâletlisi şunı da qoştı ki, Rusiye işğalci akimiyetiniñ basqısı neticesinde Qırımdan ketmege mecbur olğan qırımtatarlar Herson vilâyetinde yerleşecek. «Anda mektep, işhanelerni açmağa tüşünemiz», – dedi o.

«Eminmiz, qırımtatarlarnıñ Vatanına qaytmasını temin etmege qolay olur. İşbu ketişatlarda qırımtatar diasporasınıñ faalligini bekleymiz. Bütündünya qırımtatar kongressiniñ prezidiumı ve yolbaşçı organları saylanılğanda, faaliyetniñ keñ programması işlep çıqarılacaq. İşğalcilerge qarşı küreş bütün dünyada destek kördi. Dünya toplulığınıñ temsilcileri qırımtatarlarnıñ rolü ne derecede büyük olğanını kördiler. Qırımtatar Milliy Qurultayı resmiy şekilde tanıldı. İlerideki küreş Ukraina terkibinde qırımtatar muhtariyetiniñ teşkil etilmesine yönelecektir. Er kes qırımtatar aqlarınıñ tiklenüvine ürmet ile yanaşacaq. Şunıñ içün biz qırımtatar diasporasınıñ temsilcilerini Ukraina terkibinde milliy muhtariyetniñ teşkil etilmesine qoşulmağa çağıramız. Biz yeñermiz, eminim», – dep qoştı qırımtatarlarnıñ yetekçisi.

Qırım.Aqiqat bildirgeni kibi, Ukraina prezidentiniñ qırımtatar halqınıñ işlerinden vekâletlisi Bütündünya qırımtatar kongressiniñ iştirakçileri ögünde çıqışta bulunıp, Rusiyege qarşı halqara sanktsiyalar Ukrainağa işğal etilgen Qırımnı qaytara bilecegini qayd etti.

Ukraina prezidenti Petro Poroşenko Qırımğa, qırımatatar halqınıñ tarihiy Vatanına ukrain devleti terkibinde milliy-territorial muhtariyet statusınıñ berilmesi aqqında «yol haritasınıñ» işlep çıqarılacağını bildirdi.

Kongresste 12 memleketten 500 vekilniñ iştirak etmesi beklenile: Ukraina, Türkiye, Özbekistan, Qazahistan, Qırğızistan, Litvaniya, Romaniya, Poloniya, Frenkistan, Rusiye, AQŞ ve Kanada.

Rusiye yarımadanı işğal etken soñ 2014 senesi fevral 27-den bugünki künge qadar 15 biñ qırımtatarı Qırımnı terk etmege mecbur oldı. Qırımtatar halqı liderleriniñ Qırımğa kirişleri yasaq etildi, demokratik yollar vastasınen saylanğan ve bütün dünyada yerli halqlarnıñ idare organlarınıñ örnegi olğan – Qırımtatar Milliy Qurultayı ve Meclisi – faaliyetlerini devam ettirmek imkânından marum qaldılar, olarnıñ mal-mülki ise musadere etildi.

İşbu vaziyetni nazarda tutıp, II Bütündünya qırımtatar kongressini Türkiye paytahtı – Ankarada keçirmek kibi qarar alındı. Ankarada qırımtatarlarnıñ eñ büyük diasporası yaşamaqta.

XS
SM
MD
LG