Link açıqlığı

Saatnıñ esas haberi

Qırımda insan aqlarına riayet etilmesi yalıñız işğal bitkeninden soñ mümkündir – uquq qoruyıcılar


İnsan aqları boyunca Qırım alan eyyeti «Qırım vaziyeti: talil» er ayılq maruzasını taqdim etti. Qırım.Aqiqat bildirgeni kibi, uquq qoruyıcılarınıñ fikrine köre, yarımadada insan aqlarınıñ ğayrıdan tiklenmesi yalıñız Qırım işğalden azat etilgeninden soñ mümkün.

«Başta bir Rusiye Qırımda yamanlıq olğanını ya da olmağanını isbatlamaq – maqsadımız degil edi. Rusiye Qırımda öz qanuniyetini tiklegeninden soñ anda ne olıp keçkenini teşkere edik. Yıl devamında çalışıp ve meselelerniñ ilerilemesini taqip etip, Qırımna insan aqlarına riayet etilmesi yalıñız yarımadanıñ işğalden azat etilmesinden ve Qırım üzerinde Ukraina mutsaqilliginiñ üküm sürgeninden soñ mümkün olğanını añladım. Buña misal – daima nezaretimiz altında bulunğan işlerdir», – dedi Kiyevde keçirilgen matbuat konferentsiyasında Qırım alan eyyetiniñ analitigi, rusiyeli Vissarion Aseyev.

Esabat adet üzre Qırım vaziyetini aydınlatqan bir qaç bölükten ibarettir. Uquq qoruyıcılar Qırım sakinleriniñ vatandaşlıq ve siyasiy aqlarını, yaşayış aqqı, serbestlik, mustaqil mahkeme aqlarını, Qırımnı terk etmege mecbur olğanlarnıñ meselelerini nezaret eteler.

Bunıñ ile esabatta Rusiye Federatsiyası tarafından alıp barılğan bir sıra cinaiy iş baqıla, şu cümleden – Kostenkonıñ işi.

«Kösterilgen cinaiy işler Qırımda olayatqanınıñ daimiyligini köstere. Bu yalıñız aq ve serbestlikniñ bozuluvı degil, bu repressiya, qorquzuv, basqı, söz serbestliginiñ bozuluvı içün qullanılğan bir sistemadır», – tarif ete Ukrainada Qırım alan eyyetiniñ koordinatorı Olga Skripnik.

O şunı da qayd etti ki, Qırım alan eyyetiniñ esabatlarını insan aqları saasında çalışqan bütün halqara teşkilâtları qullana eken, olarnıñ arasında BMT, Avropa Şurası, OSCE ve başqaları.

XS
SM
MD
LG