Link açıqlığı

Saatnıñ esas haberi

Rusiyeli Qırım ükümetinde vazifelerni eda etken qırımtatarlar sabıq safdaşı Çiygozğa hainlik yaptılar – mabusnıñ ömür arqadaşı


Qırımtatarlar – akimiyet temsilcileri – Meclis reisiniñ muavini Ahtem Çiygoznıñ işinde kefil olmağa azır degil ekenler. Bu aqta Çiygoznıñ ömür arqadaşı Elmira Ablâlimova bildirdi.

«Qırımda RF Taqiqat komitetiniñ reberi muavinleriniñ biri ile qonuşqanda, Ahtem içün «fevral 26» işiniñ diger iştirakçileri tarafından şahsiy kefalet berilse, onıñ apiste bulunması ile bağlı mesele baqıla bilecegini bildirdiler. Kefaletniñ neticesi mıtlaqa müsbet olacağını aytmadılar, amma buña ümüt berdiler», – yazdı o Facebookta ve artıq susmağa sabırı olmağanını qayd etti.

Qadınnıñ çetin ümütsizligi akimiyetteki qırımtatarlarnıñ Çiygoz ailesiniñ ricasına olğan munasebetinden peyda oldı.

«Bizge añlattılar ki, kefaletni akimiyet işançına lâyıq olğanlar, yani şu akimiyetniñ özünde bulunğanlar bermeli. Biz akimiyette olğan qırımtatarlarnıñ «temsilcilerinden» birine muracaat etip, Ahtemge kefil olmağa ricada bulundıq ve onıñ Qırımğa çıqmaycağını ve taqiqattan saqlanmaycağına kefaletlerni berdik», – dey Ablâlimova.

Onıñ sözlerine kor, bu anden aleket başlandı: de ariza bilgisayarda basılmaq kerek, o ise elnen yazılğan, de ariza metni yañlış, arizacılardan mıtlaqa bir qıç ibareni qoşıp, yañı soynı yazmaq kerek, arizacılar – Ahtemniñ esli başlı ana-babasıdır. De ceza qararını deñiştirmek içün mıtlaqa Ahtemni Bağçasaray regional meclisi reisiniñ vazifesinden boşatmaq kerek, de mıtlaqa insanlarnı akimiyet tarafından azırlanılğan Hıdırlezge çağırmağa kerek eken.

«Diñleñiz, «temsilci» efendiler! Sizni nege tayinlediler ya da siz öz-özüñizni tayinlediñiz? Ne içün siz vatandaşıñızğa nisbeten adaletsizlikni toqtatmaq ricamızğa bir-birinden saçma şartlarnı qoyasıñız? Ne içün Taqiqat komitetine kelip, Ahtem Çiygozğa kefil olmağa mümkün degil? Zaruriy vesiqalarnı imzalamaq ve oldı. İş bitti!», – dep muracaat ete Çiygozıñ apayı akimiyetke olğan qırımtatar halqınıñ temsilcilerine.

Bunıñ ile o «belli adiselerden» evel qırımtatarlar birlikte olğanını qayd etti.

Ablâlimovanıñ aytqanı kibi, aqayınıñ dost ve zenaatdaşları Qırımda Rusiye Taqiqat komitetine muracaatnı imzaladılar, amma bu sağlığı zayıf olğan Çiygoznıñ vaziyetini deñiştirmedi.

Aqmescitniñ Kiyev rayon mahkemesi iyül 28 künü Çiygoznı 2015 senesi noyabr 19-na qadar apiste qaldırdı.

Onıñ taqiqatı çerçivesinde «kütleviy numayışlarnı teşkil etüv ve iştirak etüvde şeklengen» Qırımtatar Milliy Meclisiniñ reis muavini Ahtem Çiygoz yanvar 29-da yaqalandı. Onı 2015 senesi fevral 19-ğa qadar apiske aldılar, soñra da apis müddetini mayıs 19-ğa qadar arttırdılar.

XS
SM
MD
LG