Avropa parlamenti deputatlarınıñ fikirince, işğal etilgen Qırımdan vaqtınca köçip kelgen insanlarnı Qırım Muhtar Cumhuriyetine yaqın regionlarda yerleştirmek kerek, böylece işğal bitken soñ insanlar evlerine daa qolay qaytırlar. Avropa deputatlarınıñ zanınca, bu vaziyette Gürcistandan örnek almaq kerek.
Bu tekliflerni olar qırımtatar halqınıñ milliy lideri, Ukraina prezidentiniñ qırımtatar halqınıñ işlerinden vekâletlisi Mustafa Cemilev ile körüşkende seslendirdiler, dep haber ete onıñ matbuat hızmeti.
«Avropa deputatları işğal etilgen yerlerde insan aqları ve qırımtatarlarnıñ cemaat aq-uquqlarına riayet etüv vaziyeti, mecburen köçip kelgenlerniñ problemleri, em de ukrain devletiniñ tamır qırımtatar halqına nisbeten areketlerini soradılar», – dep aytıla matbuat hızmetiniñ haberinde.
Avropa deputatları Qırım buhranı aqqında aytıp, «Qırım daimi nezaret altında bulunğanını, Rusiye istilâsı ile küreş ketkenini ve Ukraina mustaqilligi ve topraq bütünligi ğayrıdan tiklengenine qadar küreş devam etecegini» qayd ettiler.
2014 senesi fevralniñ soñunda martnıñ başında Rusiyeden ve Rusiye Qara deñiz flotunıñ qırım bölüklerinden atılğan ordular Qırım yarımadasını işğal ettiler.
2014 senesi mart 16 künü Qırım ve Aqyarda yarımadanıñ statusı aqqında «referendum» keçirildi. Onıñ neticesinde Rusiye Qırımnı öz terkibine qoştı. Ne Ukraina, ne Avropa birligi, ne de AQŞ neticelerni tanıdı ve bunı Rusiye tarafından Qırımnıñ işğali olaraq sayalar.
Bundan soñra AQŞ ve Avropa Birligi Rusiyege qarşı bir sıra iqtisadiy cezalarnı kirsettiler. Ğarp Qırım Ukraina olğanını ayta.
Yarımada işğalinden soñ qırımlılar, şu cümleden qırımtatarlar, qıtaiy Ukrainağa köçmege başladılar.
Ukraina İçtimaiy siyaset nazirliginiñ malümatına köre, Qırım ve Donbasstan köçip kelgenlerniñ sayısı 1,3 million insandan ziyadedir.
