Ukraina malümat siyaseti naziri Yuriy Stets Ukraina musulmanları, şu cümleden qırımtatar halqını Ramazan bayramınen hayırladı.
«Oraza devamında qazanğan maneviy defineler yalıñız siziñ variyetiñiz degil, bütün memleketniñ variyeti olsun», – dep aytıla onıñ Facebooktaki hayırlavında.
«Bir devletimizniñ kökü bizim ve siziñ qorantalarıñız içün barışıq olsun. Ukraina toprağı arzu ve ümütleriñizniñ kerçekleşmesinde qaviy temel olsun. Qırım – Ukrainadır!», – dep qayd etti nazir.
Ukraina prezidenti Petro Poroşenko da Oraza bayramınen hayırladı.
Oraza bayramı – Ramazan ayınıñ orazası bitkenini ifadelegen islâm taqviminiñ eki büyük bayramından biridir. Bu sene bayram iyül 17-ge rastkeldi, bayramnı üç kün boyunca qayd eteler. Cuma künü Qırım ve Aqyarda tatil ilân etildi.
Bu kün saba saat 6-da Qırımda bayram namazı qılındı. Zenaat birlikleri sarayında tahminen 800 kişi toplaştı. Qırım musulmanları müftisi acı Emirali Ablayev vaaz berdi. Bayram namazları Qırımnıñ bütün camilerinde qılındı.
