Ukraina prezidenti Petro Poroşenko Ukraina musulmanlarını bu sene iyül 17-de qayd etilgen Oraza bayramınen hayırlay.
Qırımtatarca yazğan hayırlav sözleri Twitterde Poroşenkonıñ ve Ukraina prezidenti memuriyetiniñ resmiy saifelerinde yerleştirildi.
«Oraza Bayraminiz hayirli olsun!», – dep aytıla mesaclarda.
Oraza bayramı – Ramazan ayınıñ orazası bitkenini ifadelegen islâm taqviminiñ eki büyük bayramından biridir. Bu sene bayram iyül 17-ge rastkeldi, bayramnı üç kün boyunca qayd eteler. Cuma künü Qırım ve Aqyarda tatil ilân etildi.
Bu kün saba saat 6-da Qırımda bayram namazı qılındı. Zenaat birlikleri sarayında tahminen 800 kişi toplaştı. Qırım musulmanları müftisi acı Emirali Ablayev vaaz berdi. Bayram namazları Qırımnıñ bütün camilerinde qılındı.
