Qırım siyasetçileri Qırımtatar Milliy Meclis reisi Refat Çubarovnıñ Ukraina yañı Anayasasında Qırımğa qırımtatarlarnıñ milliy-territorial muhtariyetniñ berilmesi aqta olğan teşebbüsini tenqit eteler.
Şu cümleden, Qırımnıñ Rusiye akimiyetinde çalışqan qırımtatarlar bu ğayeni manasız olaraq tanıy. Qırımnıñ Rusiye devlet şurasınıñ deputatı Lentun Bezaziyev Qırım.Aqiqatqa aytqanı kibi, al-azırda Qırım yarımadası Rusiye Federatsiyası terkibinde buluna, şunıñ içün Ukraina Anayasasına deñişüvlerniñ kirsetilmesi qırımlılarğa iç tesir etmez.
«Bugün Ukrainada çalışqan Çubarovnıñ Qırımğa ne alâqası bar? Mında Qırım Cumhuriyetiniñ Anayasası qabul etildi. Qırımnıñ Esas qanunı bıltır aprel ayında qabul etilgeninden sоñ, daa nasıl anayasa aqta aytmağa mümkün? Ne istese, onı uydura bile, onıñ ve Kiyev akimiyetiniñ işi. Amma tren çoqtan ketti», – dey Bezaziyev.
Çubarovnıñ teklifi ile 1998 senesi QMC Anayasasınıñ müelliflerinden biri, «Kommunistı Rossii» firqasınıñ Qırım bölüginiñ reberi Leonid Graç da kesen-kes razı olmadı.
«Qırım çoq sımalı, çoq milletli kibi ola bile. Qırım qırımtatar halqınıñ ayrı milliy teritoriyası olamaz. Qırımlılarnıñ bir 87% yarımadanıñ qırımtatarlarnıñ milliy muhtariyeti olacağı ile razı olamaz. Vaziyetni kerginleştirmege kerekmey, bundan fayda çıqmaz», – dey Graç.
Siyasetçi şunı da qoştı ki, Qırım aqta Anayasağa deñişüvlerni kirsetkende, Petro Poroşenko ve onıñ etrafı «kendi ve bütün Ukrainanı masqara eteler». Çünki, dey Graç, yarımadanıñ «resmiy Kiyevge iç bir alâqası yoq».
Siyasetçi ve ekspertler halqara teşkilâtlarnıñ temsilcileri ile birlikte Ukraina Anayasasınıñ deñişüvleri üzerinde işlemege devam ete. Beklenilgeni kibi, memleketniñ Esas qanunındaki eñ müim deñişüvleri akimiyetniñ detsentralizatsiyası ile bağlı olacaq.
