Ukraina prezidentiniñ qırımtatarlarnıñ işlerinden vekâletlisi ve Ukraina halq deputatı Mustafa Cemilevniñ matbuat hızmetinde Mustafa Cemilevniñ AQŞ senatorı Christopher Murphyge sanki yollanılğan mektüp aqqında malümatnı red eteler. Bu aqta vekâletliniñ matbuat hızmeti Facebook saifesinde bildire.
Malüm olğanı kibi, iyül 8 künü internette bu mektüp aqqında malümat peyda oldı. Matbuat hızmeti işbu bildirüvni red ete.
«Mustafa Cemilev ingliz tilinde blanklarnı qullanmay. İftira içün qullanılğan blanklar iç te yoqtır. İmzası kopiyalanğan ve «yapıştırılğandır». Resmiy mektüpler mavı merekep ile imzalanıla. Vekâletli ve halq deputatınıñ mektüpleri Ukraina Yuqarı Şurası ve Prezident Memuriyetiniñ mütenasip bölüklerinden keçe. İşbu «mektüpniñ» azırlanuvı ve yollanuvı boyunca iş alıp barılmadı», – denile beyanatta.
«Mustafa Cemilev işbu senatornen iç bir vaqıt körüşmedi, oña mektüp yollamadı ve almadı. Mektüpte sanki Mustafa Cemilevniñ Qırımda narazılıqlarnı azırlamağa niyeti bildirile. Bu qırımtatar halqınıñ yetekçisiniñ Qırımnı yalıñız iqtisadiy sanktsiya ve Rusiyege qarşı mahkeme arizalarınıñ berilmesi ile qaytarmaq zaruriyeti aqqında aytqanına ters kele. Ve eñ külünçli bildirüv, sanki duşman tarafına keçkenlerniñ areketi neticesnide biz qırımtatar halqınıñ yarısından çoqusınıñ destegini coydıq. Aynı zamanda ise duşman tarafına keçkenlerniñ tuvğanları bile olarnıñ areketlerini takbih ete», – deyler matbuat hızmetinde.
Deyler ki, «işbu iftira – Mustafa Cemilev ve qırımtatar milliy areketini lekelemek içün FSBniñ nevbetteki ıntıluvıdır».
2014 senesi fevralniñ soñunda martnıñ başında Rusiyeden ve Rusiye Qara deñiz flotunıñ qırım bölüklerinden atılğan ordular Qırım yarımadasını işğal ettiler.
2014 senesi mart 16 künü Qırım ve Aqyarda yarımadanıñ statusı aqqında «referendum» keçirildi. Onıñ neticesinde Rusiye Qırımnı öz terkibine qoştı. Ne Ukraina, ne Avropa birligi, ne de AQŞ neticelerni tanıdı ve bunı Rusiye tarafından Qırımnıñ işğali olaraq sayalar.
Bundan soñra AQŞ ve Avropa Birligi Rusiyege qarşı bir sıra iqtisadiy cezalarnı kirsettiler. Ğarp Qırım Ukraina olğanını ayta.
