Aqmescitte iyül 2 künü suv teminleviniñ söndürilmesi ve ealini haberdar etüv sistemasınıñ teşkerüvi planlaştırıla. Bu aqta şeer memuriyetiniñ matbuat hızmetinde bildireler.
Bildirilgeni kibi, suvnı saat 9:00 Vorovskogo-Neapolskaya, Komsomolskaya, Rubtsova, Griboyedova, Pograniçnikov soqaqlarında söndürecekler. Bunıñ ile olarğa yaqın olğan aralıq ve soqaqlarda da suv qapatılacaq. Yefremova, Tavriçeskaya, Proletarskaya, Lenina ve Krasnoarmeyskaya soqaqlarında suvnı alçaq basım ile berecekler.
Suv qapatıluvı suv teminlevi ağlarında tamir işleriniñ keçirilmesi ile bağlı, – deyler şeer memuriyetinde.
Bunıñ ile şu künü ealini fevqulâde vaziyetlerde haberdar etüv sisteması teşkerilecek. İyül 2-de saat 10-da sirenalarnıñ işletilmesi planlaştırıla.
Şeer memuriyetiniñ matbuat hızmetinde deyler ki, teşkerüv fevqulâde vaziyetler ile bağlı degil, şunıñ içün şeer sakinlerini raat olmağa çağıralar.
