Cuma künü, iyün 26-da, Aqmescitte evel Qırımtatar Milliy Meclisi yerleşken Şmidta, 2 soqağı boyunca binada «Kalğa-Sultan» tarih ve medeniyet müzeyiniñ açılması planlaştırıla.
Bu aqta «Larişes» Qırım tarihiy qoruq-müzeyiniñ matbuat hızmeti bildire.
«Müzey sergileri Qırım hanlığınıñ tarih ve medeniyeti aqqında tarif eterler. Şu cümleden qalğalar instiuttınıñ müim noqtalarını aydınlatır (qalğa – hanlıqnıñ ekinci şahısı, han olmağanda Qırım hanlığınıñ ükümdarı vazifelerini becere edi) ve Hanlar devrinde yaşağanlarnıñ ruhiy ayat, medeniyet, iqtisadiyat inkişafını kösterir», – denile tedbir anonsında.
Müzey açılışı Aqmescitke temel qoyucı I Mengli Gireyge bağışlana, 2015 senesi onıñ ölüminden 500 yıl ola.
Anonsta şunı qayd eteler ki, «Kalğa-Sultan» müzeyiniñ açılışı İlmiy araştırmalar fondunıñ esabına yapıla.
Evel Qırım.Aqiqat bildirgeni kibi, müzey olacaq binada qırımtatar tiline ögretecek olalar. Bu tedbirler «Qırım» Fondu» baş müdiri Riza Şevkiyev ile uyğunlaştırıldı.
İyün 26 künü Qırımtatar milliy bayraq künü qayd etile, amma yarımadada Rusiye akimiyeti teşkilâtçılarğa şu munasebet ile tedbirlerni keçirmege izin bermedi.
Evel bildirilgeni kibi, iyün 3 künü Kiyevde fleş mob başlandı, maqsadı – qırımtatar bayrağını Ukraina şeerlerinden keçirip, destek timsali olaraq onı qırımlılarğa bermek.
Kiyevde Qırımtatar milliy bayraq Kününi marş, avto yürüşi, sergi ile qayd etecekler.
Qırımtatarlarnıñ bayrağı – üstünde altın tamğa tasvir etilgen kök tüslü ketendir. Qırımtatar bayraq künü 2009 senesi teşkil etildi.
