Qırımtatarlarnıñ aq-uquqlarını qorçalav komitetiniñ koordinatorlarından biri, Meclis azası Eskender Bariyev «fevral 26» işi boyunca yaqalanğan Ali Asanovnıñ üzerinde mahkeme toplaşuvınıñ keçirilmesi aqta bildire. Bariyev aytqanı kibi, mahkeme toplaşuvları qapalı rejimde keçe, soñkisine köre, Asanovnı apiste avgust ayına qadar qaldırdılar.
«Mahkeme kene de onıñ tutuvında saqat babası ve dört ufaq balası olğanını nazarğa almadı», – dey uquq qoruyıcı.
«Ali sabır ete ve bütün zazuriy taqiqat ve mahkeme tedbirleriniñ tuvğan ve devlet tillerinden biri – qırımtatarca keçirilmesini ve oña qırımtatar tilinden rus tiline tericmannı bermege talap ete», – dey Bariyev.
O, Qırımda «mustaqil advokatlarnıñ qıtlığı» olğanı içün uquq qoruyıcı teşkilâtlardan yardım soray.
«Advokatlar insanlarnıñ aqlarını qorçalamağa razı olsa da, bazıda adamlar ağır iqtisadiy vaziyetlerinden sebep hızmetlerinden vazgeçmege mecbur olalar. Şu cümleden, Aliniñ qorantası şimdilik $2000 ödemek kerektir. Qırımtatar ailesinde böyle imkânlar yoq», – yazdı Bariyev Facebookta.
Qırım mahkemeleri bu iş boyunca toplaşuvlarnıñ keçirilmesini evelden bildirmey, uquq qoruyıcılar dabunı izaatlamay.
İnsan aqları Qırım alan missiyasınıñ malümatına köre, Ali Asanovnı bir gece Bağçasarayda tutıp, aprel 16-da Aqmescitke Qırımnıñ Taqiqat komitetine sorğuğa alıp kettiler. Uquq qorçalayıcılarnıñ bildirgenine köre, «fevral 26 işi» boyunca 4 qırımtatarı yaqalandı.
Hatırlatamız, 2014 senesi fevral 26-da Qırım parlamentiniñ binası ögünde Qırımtatar Milliy Meclisi ve «Rus birliginiñ» bir qaç biñ tarafdarı toplaşqan edi. Tedbirni Meclis reisi Refat Çubarov ve «Rus birliginiñ» lideri Sergey Aksönov teşkil ettiler. Çatışmalar neticesinde eki insan elâk oldı. Rusiye Taqiqat komiteti bundan sebep cinaiy işni açtı.
Onıñ taqiqatı çerçivesinde «kütleviy numayışlarnı teşkil etüv ve iştirak etüvde şeklengen» Qırımtatar Milliy Meclisiniñ reis muavini Ahtem Çiygoz yanvar 29-da yaqalandı. Onı 2015 senesi fevral 19-ğa qadar apiske aldılar, soñra da apis müddetini mayıs 19-ğa qadar arttırdılar.
