Aqmescit civarında Yaşlıq qasabasında iyün 11 künü Lenur adlı adamnıñ evinde tintüv keçirildi, bundan soñ onı «E» merkezine alıp kettiler.
Bunı İnsan aqları boyunca Qırım kontakt gruppası bildire.
«Sebep ve qanuniyligi ögrenile. Yasaq bir şey tapmadılar. Lenurnı, ğaliba, esktremizmge qarşı merkezge alıp kettiler. Bazı qaynaqlarnıñ bildirgeni kibi – Lenur S. köyde camini qurğan insan olaraq bellidir», – deyler uquq qoruyıcılar.
Qırımnıñ Rusiye uquq qoruyıcı organlarından resmiy bildirüv şimdilik yoqtır.
Evel Vatandaş serbestligi merkeziniñ idare reisi, uquq qoruyıcı Aleksandra Matviyçuk aytqanı kibi, Qırımda soñ üç ay içinde siyasiy sebeplerge köre yerli uquq qoruyıcıları 22 tintüvni keçirdi.
