Link açıqlığı

Saatnıñ esas haberi

Kence Cemilevniñ işi Ukrainada bitmeli – uquq qoruyıcı


İnsan aqları boyunca Ukrain Helsinki birliginde Rusiyede qırımtatarlarnıñ milliy yetekçisi, Ukraina Yuqarı Şurasınıñ deputatı Mustafa Cemilevniñ oğlu Hayserni maküm etmek aqqı olmağanını tüşüneler.

Bunı Qırım.Aqiqatqa İnsan aqları boyunca Ukrain Helsinki birliginiñ adliye merkeziniñ müdiri Bоris Zaharov bildirdi.

Onıñ fikrine köre, Cemilevniñ işi boyunca Krasnodar diyar mahkemesiniñ qararı qanunsızdır.

«Mesele şunda ki, Krasnodar mahkemesi bu qararnı ne aqqı ile ala? Ukraina qanunına köre, bizde mahkemelik deñişken ve bu işler (Qırım işleri – muar.) Ukraina territoriyasında baqılmalı. İşbu meselede Rusiye mahkemesiniñ qararını tanımamaq kerekmiz. Qırımtatar halqınıñ yetekçisi Mustafa Cemilevge basqı etmek maqsadınen yapılğan siyasiy taqiptir», – deyler uquq qoruyıcılar.

Boris Zaharov dey ki, al-azırda «adaletli mahkeme aqqını qorçalamaq» talabı ile İnsan aqları boyunca Avropa mahkemesine muracaat etmek içün sebepleri bar.

Devlet seviyesinde, onıñ fikrine köre, Ukraina Adliye Naziriligi ve Ukraina Tış işler Nazirligi seslenmek kerek.

Qırım.Aqiqat bildirgeni kibi, Krasnodar ülkesiniñ mahkemesi çarşenbe künü, iyün 10-da, Ukraina Yuqarı Radasınıñ deputatı Mustafa Cemilevniñ oğlu Hayserni beş yılğa qadar umumiy nizam apishanesine almaq qararını qabul etti.

Devlet qabaatlayıcısı Svetlana Nekoz Hayser Cemilevge 5,5 yıllıq apis cezasını bermege teklif etken edi. Advokat Nikolay Polozovnıñ sözlerine köre, Cemilev böyle qattı cezasını qazanmadı. Em de cezasını Rusiyede degil, Ukrainada körmeli.

İyün 2 künü Krasnodar mahkemesinde mahkemeci olmağanlar maqsatlı öldürüvde qabaatlanğan Hayser Cemilevni aqladılar. Ömür cezasını belgilegen öldürüv qabaatı lâğu etildi. Cemilevniñ imayesi qarardan memnün qaldı.

Hayser Cemilevni 2013 senesi mayıs 27-de onıñ Bağçasaraydaki evinde yaqaladılar. Anda 44 yaşında Fevzi Edemov öldürilgen edi. Militsiya Cinaiy kodeksniñ 115-inci maddesiniñ 1-inci qısmı boyunca (planlaştırılğan öldürüv) cinaiy iş açtı.

Aqmescitniñ Kiyev rayon mahkemesi Hayser Cemilevni apiske aldı. Qırım işğalinden soñ taqiqat organları bu işni ğayrıdan taqiq etmege qarar berdiler. Hayserni Qırım SİZOsından Krasnodar ülkesine alıp kettiler.

Hayser Cemilev qabaatını tanımay. Adliyecisi öldürüv diqqasızlıqtan sebep olğanını bildire. Kiyevniñ Apellâtsion mahkemesi ise Hayser diqqatsızlıqtan cinayet yaptı qararına kelip, onı azat etmege qarar aldı. İnsan aqları Avropa mahkemesi de Hayser Cemilevniñ azat etilmesi aqqında qararnı qabul etti. Lâkin Rusiye onı yerine ketirmey.

XS
SM
MD
LG