Cemaat ve uquq qorçalayıcı teşkilâtlarınıñ vekilleri bildireler ki, Ukraina Nazirler Şurası Qırımğa kiriş ve çıqış qaidelerini belgilegende teklif ve tevsiyelerni köz ögüne almadı.
Bunı İnsan aqları Regional merkeziniñ eksperti Sergey Zayets Qırım.Aqiqatqa bildirdi.
Onıñ aytqanına köre, Ukraina Devlet sıñır hızmetiniñ vadelerine baqmadan, qaideler uquq qorçalayıcılar ile muzakere etilmedi, amma fevral ayında cemaat teşkilâtları tekliflerini seslendirgen ediler. Uquqçı bildirdi ki, cemaatçılar Nazirler şurası qabul etken qanunnıñ deñiştirilmesi içün küreşecekler.
Uquq qorçalayıcınıñ fikirince, qabul etilgen vesiqanıñ menfiy tarafları müsbet taraflarından daa çoq. Zayets tasdıqlanğan qaidelerniñ eñ telükeli yeri olaraq sıñırnı keçüv qaidelerini bozğanlarğa sıñırnı keçmege yasaq ete bileler, dep bildirdi. Ekspertniñ fikirince, bu maddege esaslanıp, Devlet sıñır hızmetiniñ hadimleri, vatandaşnı kirsetmey bileler.
Zayetsniñ qayd etkenine köre, yazma rediniñ resmiyleştirilmesi tam degil, bu sebepten qırımlılar qıtağa çıqqanda bir sıra qıyınlıqqa rastkele bileler. Kiriş ya da çıqış yasağında sebebi qayd etilmey. Onı sıñırcı ayta bile, vesiqada ise yazmasına kerek yoq.
«Nizam noqtasından ğayrı vatandaş ne bozğanını qayd etmek kerekler. Çünki maddelerge baqsañız, anda 4 ya da 5 sebep mevcut. Şu sebepten maddeniñ yalıñız adı yeterli degil», – dep ayttı uquqçı.
Ukraina Devlet sıñır hızmeti bildire ki, yañı qaideler bundan evel olğanlarnı da qanunlaştıra.
«İşğal etilgen topraqlar ile bağlı qaideler qanunlaştırıldı. Uquqsız çalışqan qaideler uquqqa uymağa başladı», – dep ayttı UDSH matbuat kâtibi Oleg Slobodân Qırım.Aqiqatqa.
Malüm olğanı kibi, Ukraina Nazirler şurası Rusiye tarafından işğal etilgen Qırım ile memuriy sıñırnı keçüv qaidelerini tasdıqladı.
2014 senesi mart ayında Qırım Rusiye tarafından işğal etilgen soñ qıtaiy Ukraina ve yarımada arasında memuriy, asılında ise – tam bir sıñır peyda oldı. Qırım vaqtınca işğal etilgenini ilân ettiler.
Şimdiki vaqıtta Qırımnıñ qıtaiy Ukraina ile «sıñırında» üç kiriş sıñır noqtası mevcut: «Or Qapı», «Armânsk» ve «Canköy», soñki ekisini Rusiyede halqara dep adlaylar.
