Link açıqlığı

Kiyevde afta devamında 56 yaşında qırımtatarı, mecburen köçip kelgen Server Abibulayev «akimiyetniñ nizamsızlığına» qarşı açlıq tuta.

Erkekniñ Qırım.Aqiqatqa aytqanı kibi, böyleliknen o memleket yolbaşçılığınıñ diqqatını celp etmege istey. Onıñ sözlerine köre, qıtaiy Ukrainağa köçip, aşamağa şeyi ve yaşamağa yeri yoq eken.

«İyün 1-den aşamayım. Maña, ekinci gruppa saqatına, devlet yardımı ayırılmalı, amma onı bermeyler. Nefaqa da daa yoqtır. Bu sebepten aşamağa şeyim yoq. İyün 3 kününe qadar yataqhanede keçine edim, yaşay edim de aytıp olamam. İyün 3-de qaravul kelip: «Demek, saqallı, on ekige qadar çıqmasañ ve yataqhanemizni boşatmasañ – seni çıqarıp atarmız» dedi», – tarif ete Server Abibulayev.

Onıñ sözlerine köre, öz açlığı aqta o Kiyev akimiyetini haberdar etti.

«Kiyev şeer devlet memuriyetine kelip ariza yazdım: «İçtimaiy siyaset Nazirliginiñ cinaiy areketsizligi ve Maslak – yataqhane komendantınıñ nizamsızlığı sebebinden – müddetsiz açlıqnı ilân etem. Gece-kündüz Mustaqillik Maydanında oacağım», – dey o.

Komendnant qabaatını red ete ve köçip kelgenniñ yataqhaneden çıqarılmasını mesken içün para tölenilmesi aqta añlaşmanı imzalamağa razı olmağanı ile añlata.

«Onı kimse quvmadı. Yaşav añlaşmasını yazmağa rica etken edim, amma o qatiyen para tölemege razı olmadı.Tek bir maqsadı bar – Kiyev ya Brovarı tarafında daireni elde etmek», – dedi Qırım.Aqiqatqa Velikaya Dımerka yataqhanesini komendantı Aleksandr Maslak.

Abibulayevniñ aytqanı kibi, o, meskenni almaq içün defalarca Ukraina İçtimaiy siyaseti Nairligine muracaat etken edi. Amma öyle de yardım körmedi.

İçtimaiy siyaset Naziri Pavlo Rozenko qırımlınıñ iddialarını sebepsiz tanıy. O şunı dey ki, mesken ve kommunal hızmetlerniñ ödenilmesi içün para oña ayrıla eken.

«O içtimaiy siyaset Nazirligine degil, qayd etilgen şeerinde mütenasip içtimaiy hızmetlerge muracaat ete bile, oña mıtlaqa yardım etmeliler», – dey Rozenko Qırım.Aqiqatqa.

Ukraina İçtimaiy siyaseti Nazirliginiñ malümatına köre, iyün 8 kününe Donbass ve Qırımdan köçip kelgenlerniñ sayısı – 1 million 331 biñ insan oldı. Maliyeviy yardım 318 000 aile içün ayırılğan.

Evel qırımtatarlarnıñ yetekçisi Mustafa Cemilev Qırım işğalinden soñ yarımadanı 35 biñ insan, şu cümleden yarısı – qırımtatarlardır» terk etkeni aqta bildirgen edi.

XS
SM
MD
LG