Link açıqlığı

Bişkekte Cemilevniñ maruzası: Qırım işğalinden soñ ğayıp olğan adamlarnıñ sayısı beş qat arttı


Mustafa Cemilev

Ukraina prezidentiniñ qırımtatar halqı işlerinden vekâletlisi Mustafa Cemilev bu afta Bişkekte halqara konferentsiyada çıqışta bulunıp, Rusiyeniñ yarımada işğalinden soñ ğayıp olğan insanlarnıñ sayısı qat-qat artqanını qayd etti. O, qırımtatarlarnıñ ğayıp olmasını siyasetnen bağladı.

Bunı Cemilevniñ matbuat hızmeti bildire.

«Maruzada qayd etile ki, 2014 senesi Qırımda umumen 156 insan ğayıp oldı. Bu malümatnı Rusiye Federatsiyasınıñ ombudsmeni Ella Pamfilova aydınlattı. Ombudsmen qayd etti ki, Rusiye Federatsiyasınıñ diger regionlarına baqqanda Qırımda adamlarnı sıq-sıq qaçıralar. İstilâcı devletniñ regionlarında üküm sürgen vaziyetni bilmeyim. Lâkin şunı aytmaq isteyim ki, ukrain Qırımında işğalden evel yılda 30-35 insan ğayıp ola edi. Demek ki, Rusiyeniñ nezareti altında bulunğan Qırımda bu cinayet 2014 senesi 400%-nı teşkil etti, yani beş qat arttı. Rusiye qaidelerini aytıp, buña köz yummaq olmaz», – dedi Cemilev.

Onıñ qayd etkenine köre, Rusiye ombudsmeniniñ ğayıp olğan 13 qırımtatarı, 24 ukrain ve 119 rus aqqında malümatı Qırım ombudsmeni Lüdmila Lubina bergen malümatından farqlana. Cemilevniñ aytqanına köre, Lubina 2014 senesi 23 qırımtatarı, 42 ukrain ve 255 rusnıñ ğayıp olğanını bildirgen edi.

«Qırımtatarlarnıñ ğayıp olmasınıñ çoqusı siyasiy sebeplerden yapılğan cinayettir. Ruslarnı aytsaq, ekseriyeti soy-soplarınen bilip bağğa çıqmay ya da yarımadanı terk etip, para qazanmağa ketti», – dep tüşüne Cemilev.

2014 senesinden itibaren Qırımda insanlar, şu cümleden qırımtatarlar ğayıp olmağa başladı. Bunı halqara uquq qorçalayıcıları qayd ete ediler. Ukraina Milliy havfsızlığı ve mudafaa şurası yarımadada 21 qırımtatarınıñ ğayıp olğanını bildirgen edi. Qırımda bunıñ taqiqatı bir de bir netice bermedi.

Qırımda insan aqlarından Rusiye vekâletlisi Lüdmila Lubina qırımtatarlarnıñ ğayıp olğanı aqqında malümatnı tenqit etip, olarnı yañlış dep adlağan edi.

XS
SM
MD
LG