Ukraina Qırım işğali içün tazminat olaraq Rusiyeniñ çetel mal-mülkiniñ tevqif etilmesini talap ete bile.
Bunı Ukraina adliye naziriniñ muavini Natalya Sevastyanova 5 kanal efirinde ayttı.
Onıñ bildirgenine köre, bunıñ içün İnsan aqları Avropa mahkemesiniñ qararı olmaq kerek.
Kiyev İnsan aqları Avropa mahkemesine şikâyet etti. Ukraina tarafı Rusiyeniñ areketleri, hususan Qırımda yapqanları İnsan aqları Avropa konventsiyasını boza, dep bildire. Böyle etip, milliy ayırım ve azap, devletleştirüvni yasaq etken ayat, azatlıq ve havfsızlıq aqqı ile bağlı maddeler bozula bile.
Ukraina adliye nazirliginiñ malümatına köre, Qırımda 400 ukrain müessisesi, em de 18 gaz yatağı devleştleştirildi.
Moskva Kiyevniñ iddialarını red etip, Qırım işğali – halqara uquqqa uyğan qoşuluv olğanını ayta.
Ukraina Rusiyeden Qırımda müessiselerni ğayıp etkeninden sebep 1 trillion grivnanı talap etken edi.
2014 senesi fevralniñ soñunda martnıñ başında Rusiyeden ve Rusiye Qara deñiz flotunıñ qırım bölüklerinden atılğan ordular Qırım yarımadasını işğal ettiler.
2014 senesi mart 16 künü Qırım ve Aqyarda yarımadanıñ statusı aqqında «referendum» keçirildi. Onıñ neticesinde Rusiye Qırımnı öz terkibine qoştı. Ne Ukraina, ne Avropa birligi, ne de AQŞ neticelerni tanıdı ve bunı Rusiye tarafından Qırımnıñ işğali olaraq sayalar.
Bundan soñra AQŞ ve Avropa Birligi Rusiyege qarşı bir sıra iqtisadiy cezalarnı kirsettiler. Ğarp Qırım Ukraina olğanını ayta.
