Link açıqlığı

Cemilevniñ ofisi bildire ki, Ukraina konsullığı Bişkek ava limanında olıp keçken vaqianı ögrenmekte


Ukraina prezidentiniñ qırımtatar halqı işlerinden vekâletlisi Mustafa Cemilevniñ ofisinde bildirgenlerine köre, Ukrainanıñ Kırgızistan konsullığı bu gece Bişkek ava limanında olıp keçken vaqianı ögrene. Anda Ukraina halq deputatı, qırımtatarlarnıñ milliy liderini üç saat nezaret altında tuttılar, dep bildire Qırım.Aqiqat.

«Ukrainanıñ Kırgızistan konsullığı meseleni al etmekte. Uquq qoruyıcılarğa yapqan areketleri ile Vena konventsiyasını bozğanlarını añlatıp, Mustafa Cemilev ve Rustem Ümerovnıñ azat etilmesini talap ettiler», – dep aytıla haberde.

Berilgen malümatqa köre, Cemilev ve mesleatçısı Rustem Ümerov Kırgızistanda konferentsiyada iştirak eteler. Konferentsiyanıñ mevzusı – «Merkeziy Asiyada migratsiya meseleleri». Tedbirni Kırgızistan Cumhuriyetiniñ Jogorku Keneşi ve Avropa Şurasınıñ Parlament Assambleyası teşkil eteler.

Gece Bişkek ava limanında politsiya 3 saat devamında Ukraina halq deputatı, qırımtatar halqınıñ milliy lideri Mustafa Cemilevni ve mesleatçısı Qırımtatar Milliy Qurultayınıñ delegatı Rustem Ümerovnı nezaret altında tuttı.

Kırgızistan akimiyeti ve uquq qoruyıcıları bunıñnen bağlı bir de bir resmiy malümat daa bermediler.

XS
SM
MD
LG