Gece Bişkekte (Kırgızistan) ava limanında politsiya 3 saat devamında Ukraina halq deputatı, qırımtatar halqınıñ milliy lideri Mustafa Cemilevni tuttı, dep haber ete QHA.
Neşirniñ malümatına köre, Cemilev mesleatçısı, Qırımtatar Milliy Qurultayınıñ delegatı Rustem Ümerov ile beraber Bişkekke konferentsiyağa Dubaydan keldiler. Ekisiniñ de pasportlarını aldılar.
Mustafa Cemilev haber agentligine bergen malümatına köre, olarnı azat ettiler, ve olar musafirhanege yol aldılar.
Cemilevniñ aytqanına köre, o, uquq qoruyıcılarğa ziyaretniñ maqsadı aqqında bildirdi – halqara konferentsiyada iştirak etmek, em de Rusiyege kirişi 5 yılğa qadar yasaq etilgenini ayttı.
Kırgızistan uquq qoruyıcıları işbu malümatnı daa tasdıqlamadılar. Qırım.Aqiqat Cemilevden tafsilâtlı malümat alacaq edi, lâkin iyün 2-de saba onıñ telefonı qapalı. Ukraina prezidentiniñ qırımtatar halqı işlerinden vekâletlisi Cemilevniñ matbuat hızmeti vaqia aqqında çoq şey bilmey, lâkin tezden malümat bermege vade ete.
