Link açıqlığı

Hersonda şeerniñ tarihında ilk sefer qırımtatar tili kursları açıldı. «Küreş» qırımtatar medeniyet-sport merkezi ve Oles Gonçar adına Herson vilâyetiniñ universal ilmiy kütüphane kurslarnıñ teşkilâtçıları oldılar, dep haber ete Qırım.Aqiqatnıñ mühbiri.

«Küreş» qırımtatar medeniyet-sport merkeziniñ reberi İbragim Suleymanovnıñ aytqanına köre, Hersonda bunıñ kibi kurslar yoq edi. Vilâyette ise qırq yıldan berli qırımtatarlar yaşay.

«Bunıñ kibi kurslarnıñ açılması – ayat ihtiyacıtır. Bizim vazifemiz – Rusiyeniñ Qırım işğali neticesinde yoq olmaq havfı altında qalğan halqımıznıñ tili ve medeniyetini saqlap qalmaqtır», – dep qayd etti İbragim Suleymanov.

«Yazda bizler Gonçar adına kütüphane bergen binada ders yapacaqmız, küzde ise şeerniñ bir de bir mektebinde derslerni keçirmege planlaştıramız», – dep ayttı kurslarnıñ reberi, qırımtatar tili ocası Vesilâ İbragimova.

Qırımtatar tilini ögrenüv boyunca birinci gruppa kurslarnıñ açılış tedbirinde şekillendirildi. Onıñ erkânında – farqlı yaş ve zenaat adamları. Tilni ögrenmek istegenlerniñ çoqusı – genç.

«Men halqımnıñ tilini mükemmel bilmek isteyim. Bizim qorantamız evde qırımtatar tilinde laf ete. Amma is etem ki, istegenim kibi onı bilmeyim», – dep añlattı kurslarğa qatnağan Herson tibbiyet kolleciniñ studenti Elmaz Halilova.

Kurslarnıñ açılış merasiminden soñ Oles Gonçar adına Herson vilâyetiniñ universal ilmiy kütüphaneniñ hadimleri kütüphaneniñ zal ve bölüklerini kösterdiler. Aleksey Zverikniñ yardımı ile balalar ukrain ve qırımtatar timsallerinen ava yılanlarını uçurttılar.

Hatırlatamız, 2014 senesi mart 20-de Yuqarı Rada qırımtatarlarnı Qırımnıñ tamır halqı olaraq tanıdı. Buña 283 deputat rey berdi.

Ukraina tamır halqı ve milliy azlıq olaraq qırımtatar halqınıñ etnik, medeniyet, til ve din hususiyetleriniñ inkişafını ve saqlap qalmasını kefil ete.

XS
SM
MD
LG