Rusiye Devlet dumasınıñ spikeri Sergey Narışkinniñ fikrine köre, Rusiyeniñ Qırım ve Aqyardan vazgeçüvi «imkânsızdır», Rusiye Federatsiyasına cezalar vastası ile basqı etmekten fayda olmaz. Bunı memur TASS agentligine bildirdi.
O şunı da bildirdi ki, Rusiyege qarşı cezalardan sebep ecnebiylerniñ çoqusı «Rusiyeden ketmek mecbur ola, çünki işbirlik toqtatıla, ticaret qapatıla».
Bu, Narışkinniñ sözlerine köre, «cezalarğa qoşulğan devletlerniñ siyaseti» neticesidir. Bu yoldan ketken «Avropa birligi Amerika basqısı altında öz-özüne zarar ketire», – dey o.
Bunıñ ile spiker kene şunı qayd etti ki, «çetel şerikler ileride de inatlığını köstere bile, amma böyleliknen maqsatlarına iriş olamaycağını añlamaq kerektirler».
«Cezalarnıñ lâğu etilmesi içün Rusiyege Qırım ve Aqyardan vazgeçmege, oña inanğan insanlarnı satmağa teklif eteler», – dedi o.
«Biz saylağan yolumızdan vazgeçmemiz, bizge basqı etmege faydasızdır», – dedi Narışkin.
2014 senesi fevralniñ soñunda martnıñ başında Rusiyeden ve Rusiye Qara deñiz flotunıñ qırım bölüklerinden atılğan ordular Qırım yarımadasını işğal ettiler.
2014 senesi mart 16 künü Qırım ve Aqyarda yarımadanıñ statusı aqqında «referendum» keçirildi. Onıñ neticesinde Rusiye Qırımnı öz terkibine qoştı. Ne Ukraina, ne Avropa birligi, ne de AQŞ neticelerni tanıdı ve bunı Rusiye tarafından Qırımnıñ işğali olaraq sayalar.
Bundan soñra AQŞ ve Avropa Birligi Rusiyege qarşı bir sıra iqtisadiy cezalarnı kirsettiler. Ğarp Qırım Ukraina olğanını ayta.
