Praga merkezinde qırımtatar halqınıñ milliy yetekçisi, Ukrana Yuqarı Şurasınıñ deputatı Mustafa Cemilevniñ süreti ile büyük keten bezi yerleştirilgen. Mında Cemilev Ukrainağa qol tutuv Maydanınıñ timsali oldı.
Qırım.Aqiatqa teşkilâtçılarnıñ aytqanı kibi, işbu Maydan bir qaç ay evelsi meydanğa ketirildi.
Avropa birligi bayrağı ve ukrain timsalleri ile çadır, bunıñ ile üstünde «No war in Ukraine» şiarı ve Ukraina şarqındaki adiselerni aks etken fotosüretler asılğan.
Teşkilâtçılar Ukrainada Rusiye istilâsını toqtatmaq talabı olğan arizağa imzalarnı toplaylar.
Bıltır noyabr ayında Çehiyada Mustafa Cemilevniñ süreti ile beş bilbord peyda olğan edi. Süreti yanında Cemilevniñ Çehiya prezidentiniñ Qırım işğali ile razı olmaq teklifiniñ teñqidi yazılğan edi.
2014 senesi fevralniñ soñunda martnıñ başında Rusiyeden ve Rusiye Qara deñiz flotunıñ qırım bölüklerinden atılğan ordular Qırım yarımadasını işğal ettiler.
2014 senesi mart 16 künü Qırım ve Aqyarda yarımadanıñ statusı aqqında «referendum» keçirildi. Onıñ neticesinde Rusiye Qırımnı öz terkibine qoştı. Ne Ukraina, ne Avropa birligi, ne de AQŞ neticelerni tanıdı ve bunı Rusiye tarafından Qırımnıñ işğali olaraq sayalar.
Bundan soñra AQŞ ve Avropa Birligi Rusiyege qarşı bir sıra iqtisadiy cezalarnı kirsettiler. Ğarp Qırım Ukraina olğanını ayta.
