Link açıqlığı

Saatnıñ esas haberi

Rusiye ОSCE şurasınıñ toplaşuvında: sürgünlik yıllığına aktsiyalarnı qırımtatarlarnıñ ricası ile lâğu ettiler


ОSCE yanında Rusiye Federatsiyasınıñ daimiy temsilcisi Andrey Kelin mayıs 21 künü Venada ОSCE Daimiу şurasınıñ toplaşuvında qırımtatarlarnıñ sürgünligi 71 yıllığına yarımadada hatıra tedbirlerini qırımtatar cemaat teşkilâtlarınıñ ricası ile lâğu etkenleri aqta bildidri. O, şuña Qırım müftiyatınıñ razılığı da bar olğanını ayta.

Bu aqta Rusiye Tış işler nazirliginiñ saytında aşkâr etilgen diplomatnıñ çıqış metninde aytıla, haber ete Qırım.Aqiqat.

«Ğarbiy zenaatdaşlarımıznıñ qırımtatar halqınıñ sürgünligi 71 yıllığı munasebeti ile qırımtatarlarnıñ aqları bozuluvı aqta bildirüvlerine baqmadan, bu sene mayıs 18 tedbirleri biraz diger şekilde keçirilgendir. Bunı «Qırım» areket ve diger cemaat teşkilâtlarınıñ ricası ile yaptılar. Matem künü kütleviy aktsiyalarnı keçirmemek ğayesine Qırım musulmanlarınıñ müftisi de qol tuttı. O, «bu künni, evel olğanı kibi, mitingler vastası ile siyasetleştirmemek» rica etti ve qırımtatarlarnı camilerge matem dualarına kelmege çağırdı», – denile beyanatta.

Rusiye diplomatı şunı qayd ete ki, mayıs 16 künü Qırım musulmanları diniy idaresiniñ yardımı ile qırımtatar yaşları Çatırdağğa çıqqan edi, mayıs 17 künü Aqmescit meydanında hatıra aktsiyası keçti.

Kelinniñ malümatına köre, mayıs 18 künü Aqmescitte memuriy binalarda devlet bayraqları tüşürildi, 1944 senesi qırımtatarlarnıñ sürgün etilgeni yerlerde gülçemberler qoyuldı.

Er sene Qırımda sürgünlik yıllığı munasebeti ile kütleviy tedbirler, şu cümleden Aqmescit merkezinde matem mitingi keçirile edi. Amma Rusiyeniñ Qırımnı zapt etkeninden soñ Aqmescit merkezinde bu kibi tedbirlerni keçirmege yasaq ettiler.

Mayıs 18 künü – Qırımtatar halqı sürgünliginiñ hatıra künü. Bu kün 1944 senesi qırımtatarlarnen tolu birinci eşelon Orta Asiyağa yollandı. Umumen 180 biñ insandan ziyade sürgün etilgen edi.

XS
SM
MD
LG